SAMBIRU 8
Abrahamu ndi Sara Anguvwiya Chiuta
Pafupi ndi Babele penga tawuni ya Uru. Ŵanthu a mutawuni iyi asopanga achiuta anandi aboza m’malu mwakusopa Yehova. Kweni penga munthu munyaki ku Uru yo wasopanga Yehova pe. Zina laki lenga Abrahamu.
Yehova wangukambiya Abrahamu kuti: ‘Tuwamu mucharu chaku, uleki abali ŵaku ndipu uluti kucharu cho ndikulongongi.’ Pavuli paki, Chiuta wangumulayizga kuti: ‘Ujengi mtundu ukulu ndipu ŵanthu anandi pacharu chosi chapasi ndiŵachitiyengi vinthu vamampha chifukwa chaku iwi.’
Abrahamu waziŵangaku cha ko Yehova wangumukambiya kuti waluti kweni wangugomeza Yehova. Mwaviyo, Abrahamu, muwolu waki Sara, awisi a Tera ndi Loti mwana wa mku waki anguvwiya ndipu angupanganya vinthu vawu ndi kwamba ulendu wawu wo wenga utali.
Abrahamu wenga ndi vyaka 75 pa nyengu yo iyu ndi banja laki angufika mucharu cho Yehova wangulayizga kuti akajengemu. Charu ichi chadanikanga kuti Kanani. Kwenuku Chiuta wangulongoro ndi Abrahamu ndipu wangumulayizga kuti: ‘Charu chosi cho utichiwona, ndazakuchipereka ku ŵana ŵaku.’ Abrahamu ndi Sara ŵenga akukota ndipu ŵengavi ŵana. Kumbi Yehova wanguchita wuli kuti wafiski vo wangulayizga?
“Chifukwa cha chivwanu, Abrahamu . . . wanguvwiya ndipu wanguluta kucharu cho wazilondiyanga nge chihara. Wanguluta chinanga kuti waziŵangaku cha ko walutanga.—Ŵahebere 11:8
Mungayanja Kuŵerenga so Nkhani Izi
KUMBI BAYIBOLU LE NDI UTHENGA WULI?
Chiuta Wachita Phanganu ndi Abrahamu
Nchifukwa wuli Abrahamu wangusamiya ku Kanani? Kumbi Yehova wanguchita phanganu wuli ndi Abrahamu?
