ISOMO 8
Iburahimu na Sara Bakorobera Yahwe
Haroho orubuga orukaba ruli haihi na Baberi nirwetwa Uru, kandi abantu barwo baramyaga baruhanga bandi omu kiikaro ky’okuramya Yahwe. Baitu omu rubuga runu hakabamu omusaija ayaramyaga Yahwe ou bayetaga Iburahimu.
Yahwe akagambira Iburahimu ati: ‘Ruga omu ka yaawe, oleke abanyabuzaale baawe, ogende omu kiikaro ekindakwoleka.’ Hanyuma Ruhanga akamuraganiza ati: ‘Noija kufooka ihanga likooto, kandi abantu ab’omu nsi yoona ndibakorra ebintu birungi habwawe.’
Iburahimu akaba atamanyire nambere Yahwe akaba n’amutwara, baitu akaikiriza kugenda. Nahabweki Iburahimu, mukazi we Sara, ise arukwetwa Tera, hamu n’omwana wa mugenzi we arukwetwa Loti bakasiba emigugu yabo baimukya orugendo nk’oku bakaba baragiirwe.
Nambere Iburahimu yahikiire omu nsi Yahwe akaba n’agonza kuboleka, akaba ahikize emyaka 75. Ensi egi bagyetaga Kanani. Iburahimu obwakaba ali omu nsi enu, Yahwe akabaza nauwe yamuraganiza ati: ‘Ensi enu yoona ey’orukurora ninyinja kugiha abaana baawe.’ Iburahimu na Sara bakaba bakuzire muno kandi batakazaire omwana wena. Hati Yahwe Ruhanga yakuhikirize ata eki yamuraganiize?
“Obwokuikiriza Iburahimu obuyayeserwe akahu’ra okurugayo, nokugenda omu kiikaro ekyakaba nagenda okuhabwa okuba obugweta; kandi yarugayo atamanyire nambere arukugenda.”—Abaheburaniya 11:8
