KAPITULO 8
Te Abraham sok te Sara la schʼuunbeyik skʼop te Dios
Ta stsʼeel te lum Babel ay yan mukʼul lum te Ur sbiile. Tey-abi te ants winiketik maba ya yichʼik ta mukʼ te Jehová, jaʼ ya yichʼik ta mukʼ te yantik diosetik. Pero ay jtul winik ta Ur te ya yichʼ ta mukʼ te Jehovae, jaʼ te Abraham sbiile.
Te Jehová la yalbey te Abrahame: “Ijkʼitaya te ana sok te afamiliatak, baan ta kʼinal te ya kakʼbat awile”. Ta patil te Dios jamal la yalbey: “Ya xkʼoat ta jpam mukʼul nasion. Ta awenta ya jpas bintik lek ta stojol te ants winiketik ta swolol Balumilal”.
Te Abraham maba snaʼoj te banti ya skʼan Jehová te ya xtikunot bael yuʼune, pero la yakʼ smukʼul yoʼtan ta stojol. Te Abraham sok te Sara te yiname, Taré te stat te Abraham sok te Lot te snichʼan sbankile, la schʼuunbeyik skʼop te Diose. La schajpan sbilukik jich jajchik ta namal beel.
Te Abraham 75 yaʼbilal-a te kʼalal kʼot sok te sfamilia ta lumkʼinal te la skʼan Jehová te ya yilike. Canaán sbiil te lume. Tey-a, te Jehová la yalbey ta jamal te kʼopetik ini: “Spisil te lumkʼinal ya awile, yame kakʼbey ta skʼab te awal anichʼnab”. Pero te Abraham sok te Sara ayix yaʼbilalik-a soknix maʼyuk yal snichʼnabik. Jich yuʼun, ¿bin-utʼil ya xkʼot ta pasel yuʼun Jehová te bin jamal la yale?
«Ta scuenta schʼuhunel yoʼtan te Abraham, [...] la schʼuhun mandar te ya xbaht ta yan lugar te ya xʼaʼbot yichʼ; hich locʼ bahel, ma ba snaʼoj te banti yac ta bahele» (Hebreos 11:8).
Yaniwan amulan-euk sk'oponel ini
TE BIBLIA SOK TE BIN YA XCHOLE
Te Dios ya xchap skʼop sok te Abrahán
¿Bin yuʼun te bajtʼ ta lum Canaán te Abrahane? ¿Bin-a te la xchap te Jehová sok te Abrahane?
