XCHANOBIL 8
La xchʼunbeik smantal Jeova li Abraan xchiʼuk Sarae
Oy jun lum ti nopol xil li mukʼta lum Babele, jaʼ sbi Ur. Li krixchanoetik tee chichʼik ta mukʼ epal jecheʼ diosetik. Pe li ta Ure oy toʼox jun vinik ti chichʼ ta mukʼ li Jeovae. Li vinik taje, jaʼ sbi Abraan.
Li Jeovae xi laj yalbe li Abraane: «Komtsano avosil, avutsʼ avalaltak jaʼ te xabat ti bu chkakʼbot avile». Vaʼun xi to jamal laj yalbe Abraan li Jeovae: «Voʼot ta aventa ta jlikes jun mukʼta lum xchiʼuk jaʼ ta aventa chkakʼbe kʼusitik lekik li krixchanoetik ta spʼejel balumile».
Li Abraane mu snaʼ bu chtakatik batel yuʼun li Jeovae. Akʼo mi jech la spat yoʼonton ta stojolal Jeova. La xchʼunbeik smantal Dios li Abraan, Sara, li stot ti Tare sbie xchiʼuk li sobrino ti jaʼ li Lote. Jaʼ yuʼun la xchapanik li kʼusitik oy yuʼunike xchiʼuk batik ti bu albatike.
Li Abraane 75 xa ox sjabilal kʼalal kʼotik xchiʼuk yutsʼ yalal li ta lum ti bu albatik yuʼun li Diose. Li lum taje, jaʼ sbi Kanaan. Kʼalal te xa ox oyike xi albatik yuʼun li Jeovae: «Li balumil liʼ chavile jaʼ ta xkakʼbeik li amomnichʼnabtake». Pe li Abraan xchiʼuk Sarae ep xa sjabilalik xchiʼuk chʼabal yalab xnichʼnabik. Vaʼun chaʼa, ¿kʼuxi chkʼot ta pasel li kʼusi laj yal Jeovae?
«Ta skoj xchʼunel yoʼonton la xchʼun mantal, yuʼun lokʼ batel sventa oy bu chbat ti jaʼ ch-akʼbat kʼuchaʼal spartee; akʼo mi mu snaʼ ti bu chbate, bat onoʼox» (Evreos 11:8).
Xuʼ van chakʼupin skʼelel xtok liʼe
LI VIVLIAE, ¿KʼUSITIK CHALBE SKʼOPLAL?
Li Diose tspas jun trato xchiʼuk Abraham
¿Kʼu yuʼun bat nakluk ta Canaán li Abrahame? ¿Kʼusi tratoal la spas Jeova xchiʼuk li Abrahame?
