FIANARAN̈A 8
Abrahama Ndreky Saraha Nan̈araka Volan̈a Zan̈ahary
Ora tanàna araiky tsy lavitry Babela. Olo tan̈y tsy nanompo Jehovah fa nivavaka tamy zan̈ahary hafa. Nisy lelahy araiky tia Jehovah tan̈y. Abrahama an̈arany lelahy io.
Ho Jehovah taminy Abrahama: ‘Ialà tran̈onao ndreky ry havanao, baka io mindao amy tany hambarako anao.’ Jehovah koa nivolan̈a: ‘Hanjary firenena maventy taranakanao, ndreky han̈ano raha tsara maro aminolo jiaby ambony tany zaho, baka aminao.’
Tsy hainy Abrahama foeky tany tiany Jehovah handihanany io, fa izy natoky Jehovah fo. Nan̈olon̈o entan̈a Abrahama ndreky Saraha vadiny. Niaraka tamindro Tera, babany niteraka izy, baka io Lota zanaka rahalahiny. Iro nandeha lavitry be.
Taminy Abrahama 75 taon̈o, iro navy tamy tany nivolan̈iny Jehovah tamindro io. Kanana an̈aran̈a tany io. Jehovah nivolan̈a taminy Abrahama: ‘Hitanao tany maventy be io, hamiako taranakanao tany jiaby io.’ Abrahama ndreky Saraha taminio efa matoe, baka io mbala tsy niteraka. Ke karakory eky hampatanteraka volan̈a Jehovah?
‘Baka amy finoan̈a nahavy Abrahama nan̈eky handeha amy tany atao lovanany. Nandeha fo izy na mbala tsendriky hainy handeha aia izy.’—Hebreo 11:8
