XOOKIL 8
Abrahán yéetel Saraeʼ tu yuʼuboʼob tʼaan
Maʼ sen náach tiʼ Babeleʼ yaan kaʼach uláakʼ junpʼéel kaaj ku kʼaabaʼtik Ur. Teʼeloʼ le máakoʼoboʼ maʼatech u adorartikoʼob Jéeoba, baʼaxeʼ uláakʼ diosoʼob. Chéen yaan juntúul máak tu kaajil Ur ku adorartik Jéeoba, u kʼaabaʼeʼ Abrahán.
Jéeobaeʼ tu yaʼalaj tiʼ Abrahán: ‹Jóokʼkech tiʼ le luʼum tuʼux yanechoʼ yéetel lukʼkech tu yiknal a láakʼtsiloʼob utiaʼal ka xiʼikech teʼ luʼum ken in weʼestechoʼ›. Ka tsʼoʼokeʼ tu yaʼalajtiʼ: ‹Yaan in beetik u jóokʼol junpʼéel nojoch kaaj tiʼ teech, yaan in bendecirkech yéetel ta woʼolaleʼ yaan in bendecirtik u maasil máakoʼob›.
Abrahaneʼ maʼ u yojel kaʼach tuʼux kun túuxtbil tumen Jéeobaiʼ, chéen baʼaleʼ confiarnaj tiʼ letiʼ. Le oʼolaleʼ Abrahán, Sara u yatan, Taré u papá
yéetel Lot u sobrinoeʼ, tu beetoʼob baʼax tu yaʼalaj Dios. Tu moloʼob tuláakal u nuʼukuloʼobeʼ ka joʼopʼ u binbaloʼob teʼ náanach viajeoʼ.Ka kʼuch Abrahán teʼ luʼum aʼalaʼab u tsʼaʼabaltiʼ tumen Jéeobaoʼ, yaan 75 años tiʼ. U kʼaabaʼ le luʼumaʼ Canaán. Teʼeloʼ Jéeobaeʼ tu prometertaj tiʼ: ‹Tuláakal le luʼum ka wilkaʼ, yaan in tsʼáaik tiʼ a paalal›. Chéen baʼaleʼ Abrahán yéetel Saraeʼ tsʼoʼok u chʼíijloʼob yéetel minaʼan u paalaloʼob. Le oʼolaleʼ, ¿bix ken u béeykuntil Jéeoba le baʼax tu yaʼaloʼ?
«Tu yoʼolal fejeʼ, Abrahaneʼ, [...] tu beetaj le baʼax aʼalaʼabtiʼoʼ ka jóokʼ u binbal tiʼ le kúuchil kun tsʼaabil bey herencia tiʼoʼ; letiʼeʼ jóokʼ u binbal kex maʼ u yojel tuʼuxiʼ.» (Hebreoʼob 11:8)