Oro ukadhu lee niai m’Abraham giku Sara gigamiri. Giweko ot ma cuu mandha ma gibino kwo i ie i adhura mi Ur, man gicaku kwo i the hema. Ento Sara ubed uwagere ngo pilembe ebino ku genogen iwi Yehova.

Sara ubino mito lee dit nia enyol nyathin uketho eyero ni Abraham kumae: ‘Ka jatic para ma Hagar unyolo nyathin, ebibedo ve nyathin para.’ I ng’ei nindo moko, e Hagar unyolo nyathin ma nico. Nyinge ubino Icmael.

Oro ma dupa i ng’eye, kinde m’Abraham udoko ku oro 99, man Sara udoko ku oro 89, welo moko adek ugam uwendogi. Abraham ukwayugi nia gikegiyom i the yen man gicam piny moko. Nyo, ing’eyo nia welone gibino jukani? Gibino jumalaika! Giyero ni Abraham kumae: ‘Oro ma cen i dwi ma rom kumeni, min ot peri binyolo nyathin ma co.’ Sara ubino winjo lembene kud i hema. E eng’iero yor i ie, man ewacu kumae: ‘Acopo nyolo nyathin andha ma dong’ adaru tii?’

Oro mi ng’eye, Sara ugam unyolo nyathin ma nico, tap calu ma malaika pa Yehova ugam uyero. Abraham ucaku nying’ nyathin ne Isak, ma thelembene tie “ng’iero.”

 Kinde ma Isak udoko ku oro 5 kumeni, Sara ugam uneno Icmael ubecayu Isak. Emito egwok wode, pieno ecidho i bang’ Abraham man eyero ire nia eriem Hagar gikud Icmael cen. Ku kwong’a Abraham umito ngo nia eriemgi. Ento Yehova uyero ni Abraham kumae: ‘Winj dwand Sara. Abigwoko Icmael bende. Ento abitimo lembe m’ang’olo iri nikadhu kud i bang’ Isak.’