Abraham bo Sara ba bé mbiibaga hala a yé ngandak nwii. Ba bi yék loñge yap ndap i Ur, ba ke niñ i mandap ma mabadô. Ndi Sara a bi tjelel bé, inyule a bé bôdôl Yéhôva ñem.

Sara a bééna ngôñ i bana man ngandak kayéle a kal Abraham le: ‘Ibale nkol wem u muda le Hagar a ngwal man, a mba wee men me ngwal nye.’ Mbus ngéda, Hagar a gwal man munlôm. Jôl jé li bé le Ismaél.

Ngandak nwii mbus, ngéda Abraham a bééna 99 ma nwii, Sara a ban-ga 89, ba bi leege bakén baa. Abraham a bi naña bo i noi isi e, le ba je ntôñ. Baa u nyi njee bakén ba, ba bé? Ba bé biañgel! Ba bi kal Abraham le: ‘I nwii u nlo, nya ngéda ini, we ni nwaa woñ n’a bana man munlôm.’ Sara a bé ikété ndap libadô, a emblege. A nol nyemede hiol, a kal i ñem wé le: ‘Baa m’a gwal toi man, nano kii me yé ñunuk?’

Nwii u bé noñ ha, Sara a gwal man munlôm ndik kiki añgel Yéhôva i bi bôn. Abraham a o nye jôl le Isak, li li nkobla le “Hiol.”

 Ngéda Isak a bééna bebee le nwii mintan, Sara a tehe Ismaél a ndegle man wé. Kiki Sara a bé sômbôl tat man wé, jon a bi ke yak Abraham inyu bat nye le a buñge Hagar bo Ismaél. Abraham a bi bôk ndugi a tjél boñ hala. Ndi Yéhôva nyemede a bi kal Abraham le: ‘Nôgôl kiñ Sara. M’a tat Ismaél. Ndi ni njel man woñ Isak nyen mimbônga nwem mi ga yon.’