Abraham yicʼot Sara cabʌlix jab ñujpuñemob. Tiʼ cʌyʌyob i yotot wen utsʼatax bʌ yaʼ ti Ur chaʼan miʼ chumtʌlob ti pisil bʌ otot. Pero Sara maʼañic chuqui miʼ yʌl come miʼ ñop ti Jehová.

Sara miʼ wen mulan i taj juntiquil i yalobil, jin chaʼan tiʼ sube Abraham: ‹Cheʼ bajcheʼ calobil mi caj j qʼuel mi maʼ wʌqʼuen i yalobil jiñi j criada Agar›. Ti wiʼil, Agar tsiʼ yʌcʼʌ juntiquil i yalobil i tsiʼ yotsʌbeyob i cʼabaʼ Ismael.

Cheʼ bʌ ñumeñix cabʌl jabil, tsaʼ cʼotiyob ti julaʼ uxtiquil wiñicob. Ti jimbʌ ora, Abraham añix 99 i jabilel, i jiñi Sara añix 89. Abraham tiʼ sube jiñi wiñicob chaʼan miʼ cʼajob i yo tiʼ yebal teʼ yicʼot chaʼan miʼ cʌytʌlob ti uchʼel. ¿A wujil ba majqui ili wiñicob? Ángelobʌch. Tiʼ subeyob Abraham ili tʼan: «Ti jiñi talto bʌ jabil, ti jumpʼejl bʌ qʼuin bajcheʼ iliyi, mi caj i yilan pañimil chʼiton bʌ i yalobil Sara a wijñam». Sara yaʼan tiʼ malil i yotot, i cheʼ bʌ tsaʼ yubi jiñi, tsiʼ mucu tseʼta i bʌ i tsiʼ ñaʼta: «¿Tiʼ isujm mi caj j qʼuel calobil cheʼ ñoxoñix?».

Cheʼ tsaʼ ochi yambʌ jabil, Sara tsaʼ yila pañimil (chʼocʼa) i yalobil, cheʼʌch bajcheʼ tsaʼ yʌlʌ i yángel Jehová. Abraham tsiʼ yotsʌbe i cʼabaʼ bajcheʼ Isaac, ili cʼabaʼʌl yom i yʌl «tseʼñal».

 Cheʼ lʌcʼʌ cincojix i jabilel Isaac, Sara tsiʼ taja i qʼuel chaʼan Ismael miʼ wajlen Isaac. Sara yom i cʌntan i yalobil, jin chaʼan tsaʼ majli i pejcan Abraham i tiʼ sube: «Choco loqʼuel jiñi Agar yicʼot jiñi Ismael». Ti ñaxan, Abraham mach yom i mel (chaʼlen) jiñi. Pero Jehová yom i cʌntan jaʼel jiñi Isaac, jin chaʼan tiʼ sube Abraham: ‹Jacʼben i tʼan Sara. Joñon mi caj j cʌntan Ismael. Pero c tʼan mi caj i tsʼʌctiyel tiʼ tojlel Isaac›.