De Abraham und d Sara sind scho lang ghürate. Si hend ihres gmüetliche Dehei z Ur ufgee und lebed jetzt imene Zelt. D Sara reklamiert aber nie, wil si uf Jehova vertraut. Si isch sicher, dass er weiss, was s Beschte für si isch.

D Sara wünscht sich ganz fescht es Chind. Drum seit si zum Abraham: «Wenn mini Dienerin, d Hagar, es Chind vo dir würd übercho, denn wär das wie mis eigete.» Nacheme Ziitli chunnt d Hagar en Sohn über. Er heisst Ismael.

Nach vilne Jahr, wo de Abraham 99i und d Sara 89i isch, chömmed drü Männer uf Bsuech. De Abraham seit ihne, si sölled sich untereme Baum usruie und öppis esse. Weisch du, wer di Bsuecher sind? Es sind Engel. Si säged zum Abraham: «S nöchschte Jahr um die Ziit wirsch du und dini Frau en Sohn ha.» D Sara isch im Zelt inne und ghört alles. Si lacht liislig für sich und denkt: «Cha ich würklich no es Chind übercho? Ich bin doch scho vil z alt.»

Im nöchschte Jahr chunnt d Sara würklich en Sohn über, eso wies de Engel vo Jehova versproche het. De Abraham git ihm de Name Isaak. Das bedütet «Lache».

De Isaak isch jetzt öppe füfi und da fallt de Sara immer wider uf, dass er vom Ismael usglacht wird. D Sara wett ihre Sohn beschütze. Drum gaht si zum Abraham und seit ihm, er söll doch d Hagar und de Ismael wegschicke. Em Abraham gfallt das zerscht gar nid. Aber Jehova wett de Isaak au beschütze. Drum seit er zum Abraham: «Los uf d Sara, wil ich wird mis Verspreche dur de Isaak wahr mache. Für de Ismael tue ich scho sorge.»