Kakaliairü Sara nuʼwayuusein Abraham. Napütüin tü nepiakat chaa Ur süpüla kepiayaain naya Loona. Nnojotpajaʼa mojuin sümüin Sara tia süka shiʼitaain saaʼin nünain Jeʼwaa.

Süka kachonweein maʼin Sara, müsü shia nümüin Abraham: «Müleka kachonle pümüin tü tachepchiakat Agar, chi süchonkai meechi aka neʼe naaʼin wanee tachon». Kachonka mapa Agar nümüin Abraham. Ismael nünülia chi süchonkai.

Kakalia süchikijee tia, wanaa sümaa 99 nuuyase Abraham otta 89 suuyase Sara, antüshii apünüinshii wayuu neʼiyou. «Anashii jeemeraale motsoʼo yaa seemioushi wunuʼukot tüü süpüla jiküinjanain wanee kasa», nümaka Abraham namüin. ¿Pütüjaa aaʼu jaraliin naya wayuukana? ¡Aapiee naya! «Soʼuweena juyakat tüseena soʼu kashikat tüü, kachonjeerü Sara, tü puʼwayuusekat, wane joʼuu toolo», namakalaka nümüin Abraham. Saapüinjaʼa Sara nanüiki na aapieekana paülüʼüjee. «Laülaairü taya süpüla kachoinjatüin», sümaka sümaa süsirajüin.

Kachonka Sara waneemüin juya süchikijee tia, ekeraajüsü tü nümakat paala chi aapiee nümaʼanajeejachikai Jeʼwaa. Isaac nünülia chi joʼuukai nutuma Abraham, «asirajaa» maluʼulu tia anülieekat.

 Wanaa sümaa jaʼralin nuuyase Isaac, shiʼrüin Sara meeʼerapalain Isaac nutuma Ismael. Süka saaʼinmajeein chi süchonkai, sümaka nümüin Abraham: «Püjüta woulia tü achepchieekat nümaa chi süchonkai». Nnojotsü naainjeein Abraham tü sümakat Saara nümüin. Süka naaʼinmajeein Jeʼwaa Isaac, nümakalaka nümüin Abraham: «Paaʼinra tü sümakat Sara pümüin, takaaliinjeechi chi püchonkai Ismael, akatsaʼa na nuuʼuliwoʼukana Isaac, nayeena na puuʼuliwoʼukana maa aka tü taküjakat achiki paala pümüin».