Abraham na Sara va kupasanene ozombura ozengi. Owo va isa omaturiro wawo omawa moUr nave katura mozondanda. Posiya Sara kena pa unauna, orondu eye wa ri nongamburiro mu Jehova.

Sara aa vanga omuatje ngandu ndi tja raera Abraham na tja: ‘Indu omukarere wandje Hagar tja panduka omuatje ma rire otjomuatje wandje omuini.’ Korusenina, Hagar wa panduka omuatje omuzandu. Ena re rari Ismael.

Ozombura ozengi kombunda yanao, indu Abraham tja ri nozombura 99 nu Sara tja ri nozombura 89, owo ve yekuryangerwa i ovandu 3. Abraham we ve ṋanga kutja ve yekusuva kehi yomuti nu ve rye pamwe. Mo tjiwa kutja ovayenda mba vari oouṋe? Owo vari ovaengeli! Owo va raera Abraham kutja, ‘Kombunda yombura imwe moruveze ndwi, mamu panduka omuatje omuzandu.’ Sara aa puratene ngunda eri mondanda. Eye we riyorera omuini na tja: ‘Mape ya tjiri e kara nomuatje, ngu mba kurupa nai?’

Ombura ndja kongorera ko, Sara wa panduka omuatje omuzandu, otja omuengeli waJehova pa kwizika. Abraham we mu ruka Isak, ndi heya kutja “Enyando eyorise.”

 Indu Isak tjari nozombura ape 5, Sara wa muna Ismael ama tjiti Isak ouhahu. Sara aa vanga okuyama omuatje we, nu otja ya ku Abraham nemu ningire kutja ma rambe Hagar na Ismael. Rutenga Abraham ka vangere okutjita nao. Posiya Jehova wa tja nai ku Abraham: ‘Puratena ku Sara. Ami me tjevere Ismael. Nungwari omakwizikiro wandje maye yenenisiwa mu Isak.’