Abraham enggau Sarah udah jadi melaki-bini betaun-taun. Seduai iya ninggalka rumah ti manah ba Ur lalu diau ba langkau kain. Tang Sarah enda mutap, laban iya arapka Jehovah.

Sarah keran deka bisi anak nyentukka iya madah ngagai Abraham: ‘Enti ulun aku Hagar bisi anak, anak nya ulih nyadi anak aku.’ Nyau kelama, Hagar amat bisi anak lelaki. Nama iya Ismail.

Betaun udah nya, lebuh Abraham beumur 99 taun lalu Sarah 89 taun, seduai bisi tiga iku temuai. Abraham mai sida belelak ba baruh pun kayu lalu mai sida makai begulai. Nemu nuan sapa temuai nya? Sida nya melikat! Sida madahka Abraham: ‘Ba urung maya tu taun baru tu ila, nuan enggau bini nuan deka bisi seiku anak lelaki.’ Sarah benung ninga ari dalam langkau kain. Iya ketawa lalu berunding dalam ati diri: ‘Baka ni ku aku ulih beranak lebuh aku nyau tuai baka tu?’

Ba taun baru nya, Sarah ngadaka seiku anak lelaki, baka ke udah disemaya melikat Jehovah. Abraham meri nama anak iya Isak, reti iya, “Ketawa.”

 Lebuh Isak beumur kira-kira lima taun, Sarah meda Ismail ngeleseka Isak. Iya deka ngelindung anak iya, nya alai iya betemu enggau Abraham lalu ngasuh iya muru Hagar enggau Ismail. Keterubah iya, Abraham enggai ngereja nya. Tang, Jehovah mega deka ngelindung Isak, lalu madah ngagai Abraham: ‘Dingaka Sarah. Aku deka nyaga Ismail. Tang semaya aku deka dikeamatka nengah Isak.’