Adun a tawen nga agassawa da Abraham ken Sara. Pinanawanda ti napintas a balayda idiay Ur ket naggigianda iti tolda. Ngem saan a nagreklamo ni Sara ta nagtalek ken Jehova.

Kayat la unay ni Sara ti maaddaan iti anak isu a kinunana ken Abraham: ‘No aganak ti adipenko a ni Agar, kasla anakkonto metten ti anakna.’ Naaddaan ni Agar iti anak a lalaki. Ismael ti naganna.

Kalpasan ti adu a tawen, idi 99 ti tawen ni Abraham ken 89 metten ni Sara, adda tallo a bimmisita kadakuada. Inawis ida ni Abraham nga aginana iti sirok ti kayo ken mangan. Ammom no siasino dagiti bisitada? Dagitoy ket anghel! Kinunada ken Abraham: ‘Inton sumaruno a tawen iti kastoy a tiempo, maaddaankayto ken baketmo iti anak a lalaki.’ Dumdumngeg idi ni Sara iti uneg ti tolda. Nagkatawa iti unegna ken napanunotna: ‘Aganakak pay ngata ket baketakon?’

Iti simmaruno a tawen, naganak ni Sara iti ubing a lalaki, kas iti inkari ti anghel ni Jehova. Pinanaganan ni Abraham ti anakna iti Isaac, a ti kayatna a sawen ket “Katawa.”

 Mabalin a lima ti tawen ni Isaac idi nakita ni Sara a kanayon nga uy-uyawen ni Ismael. Kayat ni Sara a protektaran ti anakna isu nga imbagana ken Abraham a papanawenna da Agar ken Ismael. Idi damo, saan a kayat ni Abraham ngem kinuna ni Jehova: ‘Dumngegka ken Sara. Aywanakto ni Ismael. Ngem babaen ken Isaac a matungpalto dagiti karik.’