Abraham hte Sara dinghku de ai gaw shaning ni grai na sai. Shan gaw Ura mare kaw na grai pyaw ai nta hpe kau da nna ginsum hta sha nga wa ai. Raitim, Sara gaw Yehowa hpe kam sham ai majaw galoi mung aput angun n tsun ai.

Sara gaw kasha grai lu mayu ai majaw, Abraham hpe ndai hku tsun ai: ‘Lama na nye a shangun ma Hagara hta kasha lu yang, nye a kasha zawn rai na re.’ Dai hpang Hagara gaw shadang sha shangai wa ai. Shi a amying gaw Ishmaela re.

Shaning law law na ai hpang, Abraham a asak gaw 99 ning, Sara gaw 89 ning rai sai. Shanhte kaw manam masum sa chyai ai. Abraham gaw shanhte hpe hpun npu kaw hkring sa la na matu shaga la nna malu masha daw ya ai. Dai manam ni gaw kadai ni re ai hpe nang chye ai kun? Lamu kasa ni re. Shanhte gaw Abraham hpe ndai hku tsun ai: ‘Hpang na shaning ndai aten hta nang hte na a madu jan gaw shadang sha langai lu wa na re.’ Sara gaw sum kata kaw nna madat nga ai. Shi mani nna ndai hku myit nga ai: ‘Ngai gaja wa kasha lu na kun? asak grai kaba sai wa.’

Hpang shaning hta gaw, Yehowa a lamu kasa ga sadi jaw da ai hte maren Sara gaw sadang sha shangai wa ai. Abraham gaw Isak ngu shamying ya ai. Lachyum gaw “Mani ai” re.

 Sara gaw Isak asak manga ning daram hta, shi kasha hpe Ishmaela dang sha nga ai hpe mu dat ai. Shi kasha hpe shi makawp maga ya mayu ai. Dai majaw, Hagara hte Ishmaela hpe kaga de pru mat shangun na matu Abraham hpe tsun ai. Shawng nnan hta gaw Abraham dai hku n kam galaw ai. Raitim, Yehowa gaw Abraham hpe ndai hku tsun ai: ‘Sara a ga hpe madat ya u. Ishmaela hpe ngai yu ya na. Nye a ga sadi gaw Isak kaw nna sha hpring tsup wa na.’