Iburahimu na Sara maaikarĩte kĩhiko-inĩ mĩaka mĩingĩ. Nĩ maatigĩte mũciĩ wao mwega taũni-inĩ ya Uru na maaikaraga hema-inĩ. No Sara ndeeriraga nĩ ũndũ wa gũtiga mũciĩ wao mwega tondũ aarĩ na wĩtĩkio harĩ Jehova.

Sara nĩ eeriragĩria mũno kũgĩa mwana nginya akĩra Iburahimu ũũ: ‘Mũngĩgĩa mwana na Hagari ndungata yakwa, ingĩona mwana ũcio ta arĩ wakwa.’ Thutha wa ihinda, Hagari nĩ aagĩire na kahĩĩ getagwo Ishumaeli.

Mĩaka mĩingĩ thutha ũcio, Iburahimu arĩ na mĩaka 99 na Sara arĩ na 89, nĩ maacereirũo nĩ ageni atatũ. Iburahimu nĩ aamanyitire ũgeni rungu rwa mũtĩ nĩguo marĩanĩre. Hihi nĩ ũĩ ageni acio maarĩ a? Maarĩ araika! Meerire Iburahimu ũũ: ‘Mwaka ũyũ ũngĩ ihinda o ta rĩrĩ, mũrĩ na mũtumia waku nĩ mũkaagĩa kahĩĩ.’ Sara aarĩ hema-inĩ, no nĩ aaiguaga ũrĩa moigaga. Aathekire na ngoro akĩĩyũria: ‘Niĩ no ngĩe mwana o na ndĩ mũkũrũ ũũ?’

Mwaka ũrĩa warũmĩrĩire, Sara nĩ aagĩire na kahĩĩ o ta ũrĩa mũraika wa Jehova aamwĩrĩte. Iburahimu eetire kahĩĩ kau Isaaka, rĩĩtwa rĩrĩa riugĩte “Mĩtheko.”

 Isaaka arĩ na mĩaka ta ĩtano ũguo, Sara nĩ onire atĩ Ishumaeli nĩ aanyũrũragia Isaaka. Tondũ nĩ eendaga kũgitĩra Isaaka, aathire kũrĩ Iburahimu na akĩmwĩra aingate Hagari marĩ na Ishumaeli. Kĩambĩrĩria-inĩ, Iburahimu ndeendaga kũmaingata. No Jehova aamwĩrire ũũ: ‘Thikĩrĩria ũrĩa Sara arakwĩra. Nĩ ngũmenyerera Ishumaeli, no ciĩranĩro ciakwa ngaacihingia kũgerera harĩ Isaaka.’