Mbalahamu ni Sala akexile kiá ni mivu iavulu kala makaza. Ene a xisa inzo iambote, iá ai mu tunga mu balaka. Maji né muene kiki, Sala ka kexile mu dizuma mba mu kuditenda, mukonda ua dielele kuila, Jihova ueji kua langa.

Sala ua mesenene kukala ni mona, iu ua zuela kua Mbalahamu: ‘Se u vuala mon’a ni selevende iami Hangale, nga-nda mu sasa muene kala eme nga mu vuala.’ Mu kubhita thembu, Hangale ua vuala muene mon’a. O dijina diê Ijimaiele.

Mu kubhita mivu iavulu kioso Mbalahamu kia kexile ni 99 a mivu, o Sala ni 89 a mivu, a kundu ku kitatu kia maiala. Mbalahamu uexana o maiala, phala kunhoha bhu kilembeketa kia muxi, phala kuxakuta kadikoka. Uejiia se o kitatu kia maiala ió exile nanhi? Exile jianju! Ene a tangela Mbalahamu: ‘Muvu ku pholo eie ni muhatu ué, mua-nda vuala mon’a.’ Sala ua kexile mu balaka, maji ua kexile mu kuívua o maka oso akexile mu zuela. Kioso kiévu o maka enhó, ua mateka kuelela iu uambe: ‘Eme nga kuka kiá kiki, kiebhi ki ngi tena kuvuala dingi?’

Mu kubhita muvu kala kia zuelele o anju ia Jihova, Sala ua vuala muéne mona. Mbalahamu ua mu bhana o dijina dia Izake, dilombolola “Kuolela.”

 Kioso Izake kia kexile ni kitanu kia mivu, Sala ua mono Ijimaiele kuzukutisa Izake ni ku muolela. Muene ua mesenene kulanga mon’ê iu ua zuela ni Mbalahamu, phala kukaia Hangale ni Ijimaiele. Ku dimatekenu Mbalahamu ua ditunu. Maji Jihova uambela Mbalahamu: ‘Bhanga kala kia mesena Sala. Ku tandanganhe ni Ijimaiele, eme nga-nda mu langa. Maji o kikanenu ki nga bhange n’eie, kia-nda dikumbidila kua Izake.’