Ebraam ɛn Sera dɔn mared fɔ lɔng tɛm. Dɛn bin lɛf dɛn fayn os na Ɔ ɛn go liv na tɛnt. Bɔt Sera nɔ bin de grɔmbul bikɔs i bin abop pan Jiova.

Sera bin rili want fɔ gɛt pikin, so i tɛl Ebraam se: ‘If mi savant Ega bɔn pikin, i go bi lɛk mi yon.’ Leta, Ega bɔn bɔypikin. In nem na Ishmɛl.

Afta sɔm tɛm, we Ebraam bin ol 99 ia ɛn Sera bin ol 89 ia, dɛn bin gɛt tri pipul dɛn we kam fɛn dɛn. Ebraam tɛl dɛn fɔ rɛst ɔnda wan tik, ɛn i gi dɛn sɔntin fɔ it. Yu sabi udat na dɛn pipul dɛn de? Na bin enjɛl dɛn! Dɛn bin tɛl Ebraam se: ‘Dis sem tɛm nɛks ia, yu ɛn yu wɛf go bɔn bɔypikin.’ Sera bin tinap insay di tɛnt de lisin. We Sera yɛri wetin dɛn se, i laf na in at ɛn se: ‘A go ebul fɔ bɔn pikin pan ɔl we a dɔn ol so?’

Di ɔda ia, Sera bɔn bɔypikin, jɔs lɛk aw Jiova in enjɛl bin dɔn prɔmis. Ebraam nem am Ayzak, we min “Laf.”

 We Ayzak bin ol lɛk fayv ia so, Sera si we Ishmɛl de provok Ayzak. I bin want fɔ protɛkt in bɔypikin, so i go mit Ebraam ɛn tɛl am fɔ drɛb Ega ɛn Ishmɛl. Fɔs, Ebraam nɔ bin want fɔ du dat. Bɔt Jiova tɛl Ebraam se: ‘Lisin to Sera. A go kia fɔ Ishmɛl. Bɔt na frɔm Ayzak di prɔmis dɛn we a dɔn mek go kam tru.’