တၢ်မၤလိ ၉
ဖိခွါတဂၤအိၣ်ဖျဲၣ်ထီၣ်လံ
စီၤအၤဘြၤဟၣ်ဒီးနီၢ်စၤရါ ဖျီအသးအိၣ်လံအနံၣ်ဖးယံာ်လံ. အဝဲသ့ၣ်ပာ်တ့ၢ်ကွံာ် အဟံၣ်လၢ ဝ့ၢ်အူၢ်အပူၤဒီး ဘၣ်အိၣ်ဝဲလၢဒဲပူၤလီၤ. ဘၣ်ဆၣ် မ့ၢ်လၢနီၢ်စၤရါနာ်န့ၢ် ယဟိဝၤယွၤအဃိ အဝဲ တကဒူးကဒ့ၣ်တၢ်ဘၣ်.
နီၢ်စၤရါသးလီဝဲအဖိအဃိ အဝဲတဲဘၣ်စီၤအၤဘြၤဟၣ်လၢ– ‘ယကုၢ်မုၣ်နီၢ်ဟၤကၢ် မ့ၢ်အိၣ်ဖျဲၣ်ထီၣ်အဖိတဂၤန့ၣ် ကလီၤဂာ်ဒ်ယဖိအိၣ်ဝဲအသိးလီၤ.’ လၢခံန့ၣ် နီၢ်ဟၤကၢ်အိၣ်ဖျဲၣ်ထီၣ်ဝဲ အဖိခွါတဂၤလီၤ. ဒီးဖိသၣ်အံၤအမံၤမ့ၢ်ဝဲ စီၤယံးၡမၤဧ့လးလီၤ.
တၢ်ဆၢကတီၢ်ပူၤကွံာ်အါနံၣ်ဝံၤအလီၢ်ခံ ဖဲစီၤအၤဘြၤဟၣ်အသးအိၣ်ဝဲ ၉၉ နံၣ်ဒီးနီၢ်စၤရါ အသးနံၣ်အိၣ်ဝဲ ၈၉ နံၣ်အခါ ပှၤတမှံၤသၢဂၤ ဟဲအိၣ်သကိးအဝဲသ့ၣ်လီၤ. စီၤအၤဘြၤဟၣ်တူၢ်လိာ်မုာ် ပှၤတမှံၤသၢဂၤအံၤလၢ ကအိၣ်ဘှံးလၢသ့ၣ်ဖီလာ်ဒီး ဒုးအီၣ်အဝဲသ့ၣ်တၢ်အီၣ်လီၤ. ပှၤတမှံၤသၢဂၤအံၤ မ့ၢ်မတၤတဖၣ်လဲၣ်, မ့ၢ်နသ့ၣ်ညါဧါ. အဝဲသ့ၣ်မ့ၢ်မူခိၣ်ကလူးတဖၣ်လီၤ. အဝဲသ့ၣ်တဲဘၣ်စီၤအၤဘြၤဟၣ်လၢ– ‘လၢခံတနံၣ် ဖဲတၢ်ဆၢကတီၢ်အဝဲအံၤန့ၣ် နမါကအိၣ်ဖျဲၣ်ထီၣ်ဝဲဖိခွါတဂၤလီၤ.’ နီၢ်စၤရါအိၣ်လၢ ဒဲပူၤဒီး နၢ်ဟူဝဲတၢ်ကတိၤအံၤလီၤ. ဖဲန့ၣ်အခါ နီၢ်စၤရါနံၤထီၣ်ဝဲလၢအသးပူၤ ဒီးဆိကမိၣ်ဝဲလၢ– ‘ယသးပှၢ်ဖးဒိၣ်လံအဃိ ယအိၣ်ဖျဲၣ်ထီၣ်ဖိကသ့ဒံးဧါ.’
လၢခံတနံၣ်န့ၣ် နီၢ်စၤရါအိၣ်ဖျဲၣ်ထီၣ်ဝဲအဖိခွါတဂၤ ဒ်ယဟိဝၤယွၤအမူခိၣ်ကလူး အၢၣ်လီၤအီလီၤတ့ၢ်ဝဲအသိးလီၤ. စီၤအၤဘြၤဟၣ်ယုၢ်န့ၢ်ဝဲ အဖိခွါအမံၤလၢ စီၤအံၤစဲးလီၤ. အမံၤအခီပညီမ့ၢ်ဝဲ “တၢ်နံၤ” န့ၣ်လီၤ.
ဖဲစီၤအံၤစဲးအိၣ်ဝဲယဲၢ်နံၣ်ဃၣ်ဃၣ်အခါ နီၢ်စၤရါထံၣ်ဘၣ်ဝဲလၢ စီၤယံးၡမၤဧ့လးဒုၣ်ဒွဲၣ် စီၤအံၤစဲးလီၤ. မ့ၢ်လၢနီၢ်စၤရါအဲၣ်ဒိး ဒီသဒၢအဖိခွါအဃိ အဝဲမၢစီၤအၤဘြၤဟၣ် နီဟးထီၣ်ကွံာ်နီၢ်ဟၤကၢ်ဒီး စီၤယံးၡမၤဧ့လးလီၤ. အဆိကတၢၢ်န့ၣ် စီၤအၤဘြၤဟၣ်တအဲၣ်ဒိး မၤဝဲဒ်နီၢ်စၤရါတဲအီၤအသိးဘၣ်. ဘၣ်ဆၣ် ယဟိဝၤယွၤတဲဘၣ်စီၤအၤဘြၤဟၣ်လၢ– ‘မၤဒ်သိး နီၢ်စၤရါ တဲဘၣ်နၤတက့ၢ်. ယကကွၢ်ထွဲ စီၤယံးၡမၤဧ့လးလီၤ. မ့မ့ၢ် ယတၢ်အၢၣ်လီၤအီလီၤဒီးနၤန့ၣ် ကဟဲလၢထီၣ်ပှဲၤထီၣ်ခီဖျိလၢ နဖိခွါစီၤအံၤစဲးလီၤ.’
“လၢတၢ်နာ်, နီၢ်စၤရါအကစၢ်ဒၣ်ဝဲ, ဒိးန့ၢ်အဂံၢ်အဘါလၢ အကဒၢထီၣ်အချံအသၣ် . . . အဂ့ၢ်ဒ်အံၤ, ပာ်ပှၤလၢအစံးပာ်တၢ်တဂၤ လၢအကလုၢ်တီလီၤ.”—ဧ့ၤဘြံၤ ၁၁:၁၁
