Mvu miayingi miavioka tuka Abarayama yo Sara bakazalela. Basisa e nzo au yambote-mbote kuna mbanza Ure yo kwenda zingila muna saba. Kansi, o Sara kafunga makasi ko kadi wabundanga e vuvu muna Yave.

Sara kawutanga ko. Muna kuma kiaki, wavovesa Abarayama vo: ‘Avo owutidi mwana yo selo kiame Anga, o mwana ndioyo okala nze mwan’ame.’ Kuna kwalanda, Anga wawuta mwana. Bamvana e nkumbu a Yisemaele.

Vioka mvu miayingi, vava Abarayama kakala ye kimbuta kia mvu 99, o Sara kimbuta kia mvu 89, batambula nzenza tatu. Abarayama wababokela kimana bavunda vana nsi a nti yo kubavana madia. Nga ozeye aki nani i nzenza zazi? Mbasi za Nzambi! Bavovesa Abarayama vo: ‘O mvu ukwiza, ongeye yo nkaz’aku nuwuta o mwana.’ Sara muna kati kwa saba kakala, wawinikinanga e moko kiaki. Vava kawá dina mbasi kavova, wayantika seva yo kukiyuvula vo: ‘Nga ndenda kikilu wuta mwana kana una vo se i nunu kwame?’

 Muna mvu walanda, Sara wawuta mwana nze una mbasi a Yave kavova. Abarayama wamvana e nkumbu a Isaki, ina ye nsasa vo “Tusevo.”

Vava Isaki kalungisa mvu 5, Sara wamona Yisemaele wabangikanga Isaki. Sara wazola tanina mwan’andi. Muna kuma kiaki, wayenda kwa Abarayama yo kumvovesa vo kayinga Anga yo Yisemaele. Kuna lumbantiku, Abarayama katambulwila ko. Kansi, Yave wavovesa Abarayama vo: ‘Vanga dina Sara kavovese. Kutokani ko kadi ilunga-lunga Yisemaele. Kansi, o nsilu una yasila muna Isaki ulunganena.’