Aˍbraˍhanˍ leh Saˍraˇ heuˆ daꞈ ve maw jaˇ˗oˬ. Yawˇ nyiˇ gʼaˇ chehˇ sha hpehꞈ sha ve venˇ htaꞈ baˬ taˉ leh aˉ po kʼo hkʼaw ca chehˇ la ve yoˬ. Yaꞈ hkʼaˇ, Saˍraˇ Yaˬhoˉvaˬ htaꞈ gʼaˇ va ve pa taw, teˇ pawˆ kaꞈ maˇ hkʼanˇ jaw.

Saˍraˇ yaˇ heuˆ gaˇ jaˇ leh yawˇ Aˍbraˍhanˍ htaꞈ kʼoˆ piˇ ve, ‘Haˍgaˍraˆ ngaˬ ve awˬ ceˬ ma yaˇ paw la ve kʼo, ngaˬ ve yaˇ hkʼa shuˍ hpehꞈ tuˬ yoˬ.’ Maˇ maw maw gaˬ leh Haˍgaˍraˆ yaˇ paˍ paw la leh yawˇ htaꞈ Iˉshaˍmeˍlaˆ meh piˇ ve yoˬ.

Laiˉ hkʼawꞈ gaˬ leh Aˍbraˍhanˍ a shaꞈ 99 hkʼawꞈ Saˍraˇ 89 hkʼawꞈ htaˇ, hawˉ hkʼaˆ 3 gʼaˇ yawˇ hui geh ca guiˇ la ve yoˬ. Aˍbraˍhanˍ lehˬ hawˉ hkʼaˆ 3 gʼaˇ htaꞈ suhˆ cehˬ hawˉ lo gʼaˇ jehˇ tcuh leh awˍ te caˍ piˇ ve yoˬ. Hawˉ hkʼaˆ 3 gʼaˇ chi a shu le shiˍ˗aˬ laˇ? Yawˇ hui mvuhˇ naw ma tcuh yaˇ hpehꞈ ve yoˬ! Yawˇ hui Aˍbraˍhanˍ htaꞈ kʼoˆ piˇ ve, ‘nehˉ hkʼawꞈ chi teˇ yanˇ gaˬ kʼo, nawˬ leh nawˬ miˇ ma Saˍraˇ yaˇ paˍ teˇ gʼaˇ cawˬ la tuˬ yoˬ.’ Saˍraˇ aˉ po kʼo hkʼaw chehˇ taˍ leh awˬ lawn chi htaꞈ gʼa kaˇ htaˇ, ‘ngaˬ mawˇ la peuˬ ve kaꞈ awˬ tehˬ awˬ na yaˇ gʼa hu gʼa paw tuˬ laˇ’ tehꞈ dawˇ leh nyi ma hkʼaw gʼuiˬ yawˬ ve yoˬ.

Awˬ hkʼawꞈ nawˉ teˇ hkʼawꞈ gaˬ leh Yaˬhoˉvaˬ ve mvuhˇ naw ma tcuh yaˇ ka tiꞈ te piˇ taˍ ve hkʼe, Saˍraˇ yaˇ paˍ paw la ve yoˬ. Aˍbraˍhanˍ yawˇ ve yaˇ paˍ htaꞈ Iˉcaˆ meh piˇ ve yoˬ. Tcuhˉ kuiˬ lehˬ “gʼuiˬ yawˬ” ve tehꞈ kʼoˆ gaˇ ve yoˬ.

 Iˉcaˆ a shaꞈ 5 hkʼawꞈ gaˬ htaˇ, Iˉshaˍmeˍlaˆ Iˉcaˆ htaꞈ maˇ shawˍ maˇ caˆ te leh fawˉ mehˍ piˇ ve htaꞈ Saˍraˇ gʼa mawˬ ve yoˬ. Saˍraˇ Aˍbraˍhanˍ htaꞈ kʼoˆ piˇ ve, Haˍgaˍraˆ leh Iˉshaˍmeˍlaˆ htaꞈ teˇ kaˬ lo ca chehˇ tcuh˗o. Awˉ lawˉ htaˇ, Aˍbraˍhanˍ maˇ te gaˇ. Yaꞈ hkʼaˇ, Yaˬhoˉvaˬ yawˇ htaꞈ kʼoˆ piˇ ve, ‘Saˍraˇ kʼoˆ ve hkʼe te˗o. Awˬ lawn kʼo, ngaˬ ka tiꞈ te taˍ peuˬ ve hkʼe nawˬ ve awˬ ceuˬ awˬ hkʼaˇ Iˉcaˆ awˬ hkʼaw lo cawˬ la tuˬ yoˬ.’