Otoq tzikʼ nim ambʼil kykubʼlen mojeʼ Abrahán tukʼil Sara. Otoq kyaj kyqʼoʼn tbʼanel kyja attoq toj tnam Ur tuʼntzun kyanqʼin kyoj ja xbʼalun. Noqtzun tuʼnj, mintiʼtoq in tzaj tyol Sara tiʼj jlu tuʼnju qʼuqlitoq tkʼuʼj tiʼj Jehová.

Tuʼnju tajxixtoq Sara tuʼn ttzaj jun tal, xi tqʼamaʼn jlu te Abrahán: «Qa ma tzaj jun tkʼwaʼla tiʼj nmajene Agar, ok kʼokel ik tzeʼn walxixe kʼwaʼl lu». Tej tbʼet ambʼil tzaj jun tal Agar ex ok kyqʼoʼn tbʼi te Ismael.

Tej tikʼtl nim ambʼil, tej qʼiʼntoq 99 abʼqʼi tuʼn Abrahán ex 89 tuʼn Sara, e pon oxe xjal kyukʼil. I ex ttxkoʼn Abrahán tuʼn kyajlan tjaqʼ jun tzeʼ ex tuʼn kykyaj waʼl kyukʼil. ¿Ojtzqiʼn tuʼna alkyeqe? Anjelqetoq. Xi kyqʼamaʼn te Abrahán: «Tuj juntl abʼqʼi ok tzul jun tkʼwaʼla tukʼil Sara». In bʼintoq Sara tiʼj jlu toj ja xbʼalun ex tej t-xi tbʼiʼn, jaw tzeʼn toj tanmi ex kubʼ t-ximen: «¿Axpe tok tzul itzʼj jun wale ex ma chin tijine?».

Tej tikʼ jun abʼqʼi, ul itzʼji jun tal Sara, ik tzeʼn xi tqʼamaʼn t-anjel Jehová te. Ok tqʼoʼn Abrahán tbʼi te Isaac, aju t-xilen bʼibʼaj lu «tzebʼil».

Tej qʼiʼntoq jweʼ abʼqʼi tuʼn Isaac, ok tqʼoʼn twitz Sara tiʼj qa  in xmayintoq Ismael tiʼj tal. Tajtoq tuʼn tok t-xqʼuqen tal, iktzun tten xiʼ yolil tukʼil Abrahán ex xi tqʼamaʼn jlu te: «Lajoʼmexa Agar tukʼix Ismael». Tnejel, nya tajtoq Abrahán tuʼn t-xi tbʼiʼn jlu. Noqtzun tuʼnj, ax ikx tajtoq te Jehová tuʼn tok t-xqʼuqen Isaac, tuʼntzunju xi tqʼamaʼn te Abrahán: «Bʼinchankuya aju in xi tqʼamaʼn Sara teya. Ok kʼokel nxqʼuqine Ismael. Noqtzun tuʼnj, aju o txi ntziyene kjapunel twiʼ tiʼj Isaac».