Abulahamu na Sala iikazile umu cupo pa myaka iingi. Yasiile ing’anda yao isuma ku Uli, nupya iikalanga sile umu matenti. Lelo Sala atailizyanyanga, pano wataile sana Yeova.

Sala walondesyanga ukukwata umwana icakuti wanenyile na Abulahamu ati: ‘Ndi cakuti Haga umuomvi wane wakwata umwana, angaya sile kwati u mwana wane.’ Lino papisile insita, Haga wakweti umwana umonsi. Izina lyakwe wali a Isumaeli.

Pa cisila ca myaka iingi ala Abulahamu ali ni myaka 99 Sala nawe 89, aenyi yatatu yayatandaliile. Abulahamu wayapokeliile nupya iikazile umwisika lya cimuti nu kuliila pamwi ivyakulya. Uzye watuumanya aenyi yaayo? Yaali aya malaika. Yanenyile Abulahamu iyati: ‘Mwaka ukwiza, insita wakwe ii, wemo nu muci wako mulakwata umwana umonsi.’ Sala uvwanga vino yalandanga ala ali umwi tenti. Wasesile nu kulanda mu mwenzo ati: ‘Uzye icumi ne mukote vikwene ningakwata umwana?’

Umwaka uwalondeliilepo Sala wakweti umwana umonsi, wakwe vino malaika wakwe Yeova walavile. Abulahamu winike umwana wiya izina ati Isaki, icikasenula ukuti “kuseka.”

 Lino Isaki wali ni myaka umupiipi na 5, Sala waweni kuno Isumaeli akumucuzya. Walondanga ukucingilila umwana wakwe, fwandi wanenyile Abulahamu ukuti azinge Haga na Isumaeli. Pa kutandika, Abulahamu ataalondanga ukucita vivyo. Nomba Yeova wanenyile Abulahamu ati: ‘Ucite vyonsi vino Sala watakunena. Nene ndasakamala Isumaeli. Pano muli Isaki amuno ulakwatila ana yonsi yano nakulaya.’