Abraham uan Sara kipixtoyaj miak xiuitl mosenkajtoyaj. Kikajtejtoyaj kuali ininchaj tlen kipixtoyaj ipan Ur uan nama itstoyaj ipan yoyonkali. Maske Sara ayokmo kipixtoya miak tlamantli, yolpakiyaya pampa motemachiyaya ipan Jehová.

Sara tlauel kinekiyaya kipias se ikone, yeka kiiljuik Abraham: “Tlaj tikonemakas notlatekipanojka Agar, ikone elis keja na nokone”. Teipa, Agar kipixki se ikone uan kitokaxtijkej Ismael.

Kema Abraham kipixtoya 99 xiuitl uan Sara 89, eyij tlakamej kinpaxalotoj. Abraham kiniljuik ma moseuikaj itsintla se kuauitl, uan kiniljuik kintlamakaskia. ¿Tijmati ajkia inijuantij eliyayaj nopa tlakamej? Eliyayaj iluikaeuanij. Inijuantij kiiljuijkej Abraham: “Ne se xiuitl, mosiua Sara ya kitlakatiltijtos ikone”. Sara itstoya kalijtik uan kintlakakilijtoya, uan kema kikajki konepiaskia, ichtakatsi uetskak uan moiljuik: “¿Kenijkatsa nikonepias tlaj ya ninanatsi?”.

Kema panok se xiuitl, Sara kipixki se ipilkone, kej nopa iluikaejketl kiijtojtoya. Abraham kitokaxtlalik Isaac, tlen kiijtosneki “Uetskistli”.

 Kema Isaac kipixtoya se makuili xiuitl, Sara kiitak Ismael kitlaijiljuiyaya Isaac. Ya kinekiyaya kimokuitlauis ikone, yeka monojnotski iuaya Abraham uan kiiljuik: “Xijkixti Agar uan ikone Ismael”. Maske Abraham amo kinekiyaya kichiuas nopa, Jehová nojkia kinekiyaya kimokuitlauis Isaac, yeka kiiljuik: “Xijchiua nochi tlen Sara mitsiljuia pampa moteipaixuiuaj ualasej ipan Isaac. Na nijmokuitlauis Ismael”.