Abrahán uan Sara uejkaujya monamiktijkaj. Kikaujkaj kualtsin kali tein kipiayaj Ur uan mokaltalijtinemiaj itech takenkalmej. Sayoj ke Sara amo kijtouaya ke amo kiyolpaktiaya ijkon nemis porin takuaujtamatia iuan Jiova.

Kemej Sara kitelnekia kipias se konetsin, kiluij Abrahán: “Komo notekitikauj Agar kipia se konetsin mouan, nikitas kemej yeskia nejua nokonetsin”. Satepan, Agar kipiak se konetsin, uan kitokaytijkej Ismael.

Miak xiujmej satepan, keman Abrahán kipiaya 99 xiujmej uan Sara, 89, eyi takamej kinkalpanotoj. Abrahán kinyoleuak maj moseuianij koujtampa uan maj takuakan. ¿Tikmati akonimej katkaj? Katkaj ángeles. Yejuan kiluijkej Abrahán: “Okse xiuit, tejua uan monamik nankipiaskej se konetsin”. Sara takaktoya taijtikkopa, uan keman kikakik nejon, yoluetskak uan kinemilij: “¿Yekmelauj nikpiati se konetsin maski nixiuejya?”.

Se xiuit satepan, Sara kipiak se konetsin, ijkon kemej iángel Jiova motenkaujka. Abrahán kitokaytij Isaac, tein kijtosneki “uetskalis”.

 Keman Isaac kipiaya kemej makuil xiuit, Sara kiitak ke Ismael kikejkelouaya Isaac. Yejua kinekia maj amo teyi kichiuilianij ikonetsin, yejua ika kiluito Abrahán: “Xiktoka Agar uan Ismael”. Yekinika, Abrahán amo kinekia kichiuas nejon. Sayoj ke Jiova no kinekia kipaleuis Isaac, yejua ika kiluij Abrahán: “Xikaki tein kijtoua Sara. Nejua nikyekpias Ismael. Sayoj ke tein nimotenkauak mochiuas itechkopa Isaac”.