Abhirahama na Sara vainga vakarovorana ko makore mazinji. Ivona vainga vasiya nyumba yavo yakaseja ku Uri zve wari vari kurarama mutende. Asi Sara aacainyangajwepi, ngokuti waithemba Jehovha.

Sara waida maningi kuva no mwana ngokudaro wakabvunja Abhirahama kuti: ‘Kudari murandakaji wangu Hagari wakava no mwana, anozodari inga wangu.’ Mu kufamba ko nguva, Hagari wakava no mwana. Zina rake rainga Ismaeri.

Makore mazinji akakhirira, Abhirahama paainga no makore anokwana kuita 99 zve Sara wainga no makore anokwana kuita 89, vakaashira varendo vatatu. Abhirahama wakavakoka kuti agare navo pasi po miti zve ahe navo. Unovaziva kuti vainga ani varendo ava? Ivona vainga ngirozi! Ivona vakati kuna Abhirahama: ‘Pa gore rinozari pangari iyi, iwewe no mukaji wako munozova no mwana.’ Sara waizvizwa painga mukati mo tende. Wakaseka ega zve worangarira kudari: ‘Ndingavadi no mwana kamare, kasike ndaaharahwa!’

Pa gore rakatevera, Sara wakava no mwana, kudari inga ngirozi ya Jehovha yakagondesa. Abhirahama wakamudura zina ro kuti Izaki, rinoreva kuti, “Kuseka.”

 Izaki paainga waano makore mashanu, Sara wakavona Ismaeri acishora mwana wake. Iyena waida kujivirira mwana wake, ngokudaro wakaenda ka Abhirahama zve wokumbira kuti aendese ndhambo Hagari na Ismaeri. Paakatanga kuzwa izvi, Abhirahama acaidepi kuzviita. Asi Jehovha wakati kuna Abhirahama: ‘Izwai izwi ra Sara. Ndinozokhorondha Ismaeri. Asi ngo ndava ya Izaki cigondiso cangu cinozova cokadi kamare.’