Abraiau na Sara tunde apa velinepa ankho palambale omanima omanyingi. Vasapo eumbo liavo ankho ewa, avaende avakakala momakaka mo Ur. Mahi Sara keliyavele, mokonda ankho una onthumbi mu Jeova.

Sara ankho uhanda unene okukala novana pahe apopila Abraiau okuti: ‘Inkha omupika wange Agar ukala nomona makala ngatyina owange.’ Mokueenda kuomanima, Agar akala nomona. Atiwa o Isimayeli.

Etyi palamba omanima omanyingi, puetyi pahe Abraiau ankho ena omanima 99 iya Sara ankho una omanima 89, avatambula ovaenda vetatu. Abraiau evekongo vapululukuepo momuombelo yomuti iya avalipo katutu. Okuti ovaenda ovo uvei ovalie? Ankho onoandyu! Avapopila Abraiau okuti: ‘Menima maliya momuvo ngou ove nomukai wove mamukala nomona.’ Sara ankho ukahi mekaka etyiivi etyi vapopia. Ehimbika okuliyolela iya apopi okuti: ‘Ame ndyipondola umwe okukala nomona tyina nakulupale?’

Enima lialandulako, Sara akala nomona, ngetyi oandyu ya Jeova yapopia. Abraiau emuluku okuti o Isake tyihangununa okuti: “Tyiyolesa.”

 Etyi Isake atuukisa omanima etano Sara aimbuka okuti Isimayeli ukahi nokumuleva. Sara ankho uhanda okuyakulila omona wae moluotyo aende ku Abraiau iya emupopila ataate Agar na Isimayeli. Ponthyimbi, Abraiau ankho kahandele okutyilinga. Mahi Jeova apopila Abraiau okuti: ‘Tavela etyi tyapopia Sara. Ame mandyi-tekula Isimayeli. Mahi omulao wange nalinga noove maufuiswapo na Isake.’