Abrahanwan Sarawanqa unayñan casarasqa kasharanku. Ur llaqtapi wasinkuta saqespan karpa-karpapi tiyaranku. Chhaynaña kaqtinpas Saraqa Jehová Diospin confiaran.

Saraqa wawayoqpunin kayta munaran chaymi Abrahanta niran: “Esclavay Agarwan wawayoq kanki chayqa, wawaypas kanman jinan kanqa”, nispa. Tiempowanmi Agarqa qhari wawata onqokuran, sutinmi karan Ismael.

Unay watakuna qhepamanmi Abrahán 99 watanpi kashaqtin Sarataq 89 watanpi kashaqtin kinsa runakuna visitamuranku. Abrahanmi paykunata valekuran sach’aq ladonpi samarispa imallatapas mijunankupaq. ¿Pikunan karan chay runakuna? Angelkunan karanku. Paykunan Abrahanta niranku: “Jamuq watapin kay killakunapi jina esposayki qhari wawata onqokunqa”, nispa. Saraqa karpa ukhumantan uyarimusharan, jinan sonqonpi asikuspa niran: “¿Khayna edadniypi wawayoq kaymanchu?”, nispa.

Jamuq watapitaq angelpa nisqanman jina Saraqa qhari wawata onqokuran. Sutinmi karan Isaac, chayqa “asikuy” ninanmi.

 Pisqa watayoq Isaac kashaqtinmi Saraqa rikuran Ismael Isaacmanta burlakusqanta. Payqa wawantan cuidayta munaran, chaymi Abrahanta niran: “Agarta Ismaeltawan qarqopuy”, nispa. Abrahanqa manan munaranchu chay ruwayta. Jehová Diosmi ichaqa Abrahanta niran: “Uyariy Saraq nisqasuykita. Ismaeltaqa cuidasaqmi, ichaqa Isaacwanmi promesaykunaqa junt’akunqa”, nispa. Chaywanmi Jehová Diosqa rikuchiran Isaacta cuidayta munasqanta.