Abrahanbash Sarapash ashtaca huatacunatami cazarashcacuna carca. Paicunaca Ur llactapi shuj juyailla huasita saquishpami, carpa huasicunapi causanajurca. Shinapash Sara huarmiguca Jehová Diospi confiaimandami cushilla causajurca.

Sara huarmiguca shuj huahuaguta charingapami munarca. Chaimi Abrahandaca cashna nirca, ñucata sirvij Agar huarmiguhuan shuj huahuata charijpica, chai huahuaguca ñucapa huahuagushnami canga nishpa. Shinami asha tiempo jipaca Agar huarmica shuj huahuaguta charishpa Ismael shutita churarca.

Tauca huatacuna yalishca jipa Abrahán 99 huatacunata, Sara huarmigu 89 huatacunata charijpimi, quimsa jaricuna paicunata ricungapaj rirca. Chaimi Abrahanga chai jaricunataca nirca, ashaguta samapaichi, micunaguta apamupasha nishpa. Chai jaricuna ¿picuna cashcata yachanguichu? Paicunaca Diospa angelcunami carca. Chai angelcunaca Abrahandaca nircami: Sara huarmiguca ‘caya huatami shuj churiguta charinga’ nishpa. Chaitaca ‘Sara huarmiguca carpaman yaicuna pungupi shayajushpami tucuita uyajurca’. Chaita uyashpaca “paipaj shungupi asishpami cashna yajurca” ciertopachachu cai edadpi shuj huahuaguta charigrini nishpa.

Huata jipaca Jehovapa ángel nishca shinami Sara huarmiguca shuj huahuaguta charirca. Chai huahuataca Isaac shutitami Abrahanga churarca. Chai shutica “Taita Diosmi, ñucataca asichihuashca” nisha ninmi.

 Isaac casi picha huatacunata charijpica Agar huarmipa churi Ismael Isaacmanda burlarijujtami Sara huarmiguca ricurca. Sara huarmiguca paipa churita imapash ama pasachun munashpami, Abrahanhuan parlashpa cashna nirca: ‘Cai sirvij huarmitaca, paipa churindi llujchishpa cachai’ nishpa. Abrahanga, Agarta, Ismaelta llujchishpa cachangapaca na munarcachu. Shinapash Jehová Diospashmi Isaactaca cuidangapaj munarca. Chaimi Abrahandaca nirca: ‘Sara huarmigu nishcata rurailla’. Ñucami Ismaeltaca cuidasha. ‘Isaacmanda miraicunallami canba miraicuna ni tucunajunga’ nishpa.