O Avraham hem i Sara hine but berša ko brak. On mukhlje po šužo čher ko Ur hem živindže ko šatorija. Ama, i Sara na žalindža pe sebepi odova sose hine la poverenje ko Jehova.

I Sara but manglja te ovel la čhavo hem čak phendža e Avrahamese: „Ako mi sluškinja i Agara bijani čhave, me ka mangav lje sar meklje.“ Palo disavo vreme, i Agara bijandža murše čhave. Oljeso nav hine Ismailo.

Palo but berša, ked o Avraham hine lje 99 berš, a i Sara 89 berš, koro ljende alje trin manuša te posetinen ljen. O Avraham vičindža ljen te bešen talo jekh kaš te odmorinen pe hem te del ljen te han. Da li džaneja ko hine on? Odola hine o anđelija! On phendže e Avrahamese: „Aver berš ko akava vreme, tu hem ti romni ka ovel tumen čhavo.“ I Sara hine ko šatori hem šundža ljen so vačerena. Oj asandilji ano peste hem mislindža: „Sar šaj me te ovel man čhavo ked hijum odobor phuri?“

Palo jekh berš, i Sara čače bijandža murše, sar so vačerdža e Jehovaso anđeo. O Avraham čhivdža ljeso nav Isak, so značini „asajbe“.

 Ked o Isak hine lje koro pandž berš, i Sara dikhlja sar o Ismailo asala ljese. Oj manglja te zaštitini pe čhave, odoljese dželji ko Avraham hem vačerdža ljese te paldel e Agara hem e Ismaile. Ko početko, o Avraham na manglja te čerel odova. Ama, o Jehova phendža ljese: „Šun e Sara. Me ka brininav man e Ismailese. A me obećanja ka ispuninen pe prekalo Isak.“