О Авраамо и Сарра слинэ женати бут бэрша. Вонэ ашадэ пэско лашо цэр андо Уро и линэ тэ жувэн андэ бари катуна. Но и Сарра на ровэласпэ кацавя жизнятар, важ кода кай патялас лэ Иеговасти.

И Сарра фартэ камэлас бэятос, важ када ԥэндя лэ Авраамости: «Сар кай мэрни служанка Агарь авэла тутар бэято, важ мандэ во авэла, сар мэрно чачо». Прожыля время, кай и Агарь арақаделяпэ шаво. Лэс приақардэ Измаило.

После када прожылэ набут бэрша, и кала лэ Авраамости сас 99, ай ла Саррати сас 89 бэрш, каринг лэндэ авелэ трин ӷостёря. О Авраамо ԥэндя лэнди, кай вонэ тэ жан тэ отцыён и тэ хан тала витка. Ӷанэс, ко слинэ трин ӷостёря? Када слинэ анӷелоря! Вонэ ԥэндэ лэ Авраамости: «Через ек бэрш тумэндэ арақадёлапэ шаво». И Сарра сас андэ бари катуна и ашундя када. Вой заасая андэр пэстэ и гиндосардя: «Сар мандэ арақадёлапэ бэято? Мэ уже ԥури!»

Через ек бэрш, сар и ԥэндя лэ Иеговаско анӷело, кай и Сарра арақаделяпэ шаво. О Авраамо дя лэсти алав Исаако. Кадэва алав сыкавэл, кай и Сарра заасая, кала ашундя, кай латэ авэла бэято.

 Кала лэ Исаакости сас варикай панч бэрш, и Сарра додиқля, кай о Измаило приасалпэ лэстар. Вой камля тэ фэрий пэстирэ шавэс, важ када вой поджыля каринг о Авраамо и мангля лэс, кай во тэ одбишалэл варикаринг ла Агаря и лэ Измаилос. Спэрва о Авраамо отԥэнделяпэ када тэ терэл. Но Иегова кадяжэ камэлас тэ фэрий лэ Исаакос и важ када во ԥэндя лэ Авраамости: «Стер кадя, сар ԥэндя и Сарра. Мэ диқава пала Измаило. Но мэ стерава кода, пала со дэм о алав, через о Исаако».