Abirihaaminna Saara adhame lowo diro heeˈrino. Insa Uuri katamira noonsata dancha qae agure haˈre dunkaanaho heeˈrino. Saara Yihowa baxxanno daafira digunguntino.

Saara ooso ila lowo geeshsha hasidhino; konni daafira Abirihaami togo yitu: ‘Borojjichoˈya Aggaara qaaqqo ilturo, hakku qaaqqi aneha ikkanno.’ Gedensoonni, Aggaara labbaa qaaqqo iltu. Hakkunni qaaqqi suˈmi Ismaeeliiti.

Lowo diri gedensaanni, Abirihaamira 99 diro, Saarara kayinni 89 diro ikke heeˈreenna, sasu wosini insata dayi. Abirihaami insa haqqichote hunda ofoltanno gede asse sagale uyinsa. Hakku wosini ayeootiro afootto? Sokkaasinete! Insa Abirihaami togo yitu: ‘Daanno diro togoo woyite labbaa qaaqqo iltinanni.’ Saara dunkaanu giddo heedhe tenne macciishshitanni no. Ise wodanisenni togo yite osoˈlitu: ‘Ani geedhumma gedensaanni ooso ila dandeemma?’

Yihowa sokkaasinchi yiinonte gede layinki diro Saara labbaa qaaqqo iltu. Abirihaami qaaqqoho suˈma Yisihaaqi yee fushshi; Yisihaaqi yaa “Osolo” yaate.

 Yisihaaqi ontu dirihu heeˈreenna, Saara iso Ismaeeli mishanna laˈu. Ise qaaqqose Ismaeeli gawajjannokki gede Abirihaamiwa marte ‘Aggaaranna Ismaeeli fushshite haˈrisi’ yitu. Abirihaami insa haˈrisa dibaxino. Yihowa kayinni Abirihaami togo yiisi: ‘Saara yitannohere assi. Ismaeeli daafira qarrantooti. Coyiˈroommore wonsheemmohu beettikki Yisihaaqi widoonniiti.’