Fa maromaro tao zay ry Abrahama noho Saraha ro nimpivaly. Nana trano soasoa rozy ta Ora tao, fe niala bakao, le nipetraky amy tranolay. Fe tsy nitoretoreo Saraha, satria natoky ani-Jehovah.

Ta hanan’anaky marè Saraha farany nivola tamy Abrahama hoe: ‘Laha mba manan’anaky nareo roe amy Hagara mpanompoko, le mbo sahala anako avao zay.’ Niteraky anakilahy vatany Hagara. Ismaela ty anarany.

Tao maro tafara atoy, le nisy vahiny telo lahy namangy an-drozy. Fa 99 tao Abrahama tamy zay, le Saraha 89 tao. Nitaomini-Abrahama hipetrapetraky ambany hazo eo rozy, le bakeo niaraky nihina. Hainao va hoe ia vahiny reo? Anjely reo. Nivola tamy Abrahama rozy hoe: ‘Lafa afaky tao raiky, le hanan’anakilahy nareo morovaly.’ Nijanjy avao amin’io Saraha tanatini-tranolay iny ao. Homehy raiky ie sady nieritseritsy hoe: ‘Zaho fa antitsy toy va le hanan’anaky?’

Lafa afaky tao raiky, le niteraky anakilahy Saraha, araky ty nampitamanini-anjelini-Jehovah iny. Nataoni-Abrahama hoe Isaka ty anarany. “Fiheheza” ty dikani-anara io.

 Nikizakizaky ani-Isaka avao Ismaela. Nihitani-Saraha raha zay, tamy Isaka limy tao eo. Ta hiaro ani-anakiny iny ie, ka nivola ani-Abrahama mba handroaky ani- Hagara noho Ismaela. Nihalani-Abrahama tse raha zay. Fe nivola taminy Jehovah hoe: ‘Janjino raha volanini-Saraha zay. Hikarakara ani-Ismaela aho, fe baka amy Isaka ro hiaviani-raha nampitamaniko rey.’