Abraham dingangi Sara seng taunge nẹ̌kawing. I sire seng něněntang bal᷊eng i sire mapaelẹ̌ su Ur, kụ nẹ̌tanạ su tenda. Katewe i Sara tawe němorotesẹ̌, ual᷊ingu i sie mangimang si Yehuwa.

Sara sěbạe mapulu piạ anạ, hakị u ene i sie nẹ̌bera si Abraham, ’Mạeng ělangku i Hagar makaěbạ anạ, anạ ene sarung makoạ kere anạku hala.’ Bọu ene i Hagar nakaěbạ anạ esẹ. Arenge Ismael.

Taunge bọu ene, su tempong Abraham umure 99 su taunge kụ i Sara 89 su taunge, piạ tatělu sake diměnta. Abraham němaringang si sire měngirul᷊e su pungu kalu dingangu kumaěng. Apa i kau masingkạ i sai i sire? I sire ene kai malaekatẹ̌! I sire naul᷊ị si Abraham, ’Taung mahi, su tempo kere ini, i kau dingangu kawingu sarung makaěbạ anạ esẹ.’ I Sara dụdaringihẹ̌ bọu tenda. I sie liměge dingangu nẹ̌pikirẹ̌, ’Iạ ini seng maghurang, apa iạ bědang makaěbạ anạ?’

Taung tuhụe, i Sara nakaěbạ anạ esẹ, kere dianding malaekatẹ̌ i Yehuwa. Abraham něgělị areng su anạ ene Ishak, mangal᷊ene ”Liměge”.

 Su tempong Ishak umure ěndịu lima taung, Sara nakasilo Ismael mělẹ̌heghesẹ̌ si sie. I Sara mapulu měndiagạ anạe, hakị u ene i sie nẹ̌dorong si Abraham pěnokol᷊ẹ̌ si Hagar dingangi Ismael. Humotong, i Abraham madiri. Katewe Yehuwa naul᷊ị si Abraham, ’Daringihẹ̌ si Sara, ual᷊ingu diandi-Ku sarung mariadi bọu i Ishak. Iạ sarung měndiagạ si Ismael.’