Abraão no Sara kaben ona ba tinan barak. Sira husik hela sira-nia uma neʼebé kapás iha sidade Ur no hela iha tenda. Maibé Sara la muramura, tanba nia tau fiar ba Jeová.

Sara hakarak tebes iha oan, tan neʼe nia dehan ba Abraão: ‘Se ó no haʼu-nia atan Agar bele iha oan, oan neʼe sei sai hanesan haʼu-nia oan rasik.’ Ikusmai, Agar iha oan-mane ida, naran Ismael.

Tempu barak liu tiha, kuandu Abraão tinan 99 no Sara 89, sira simu bainaka naʼin-tolu. Abraão konvida sira atu deskansa iha ai-hun okos no han. Ó hatene bainaka naʼin-tolu neʼe mak sé? Sira mak anju! Sira fó-hatene Abraão: ‘Tinan oin iha tempu hanesan neʼe, ó no ó-nia feen Sara sei iha oan-mane ida.’ Sara mós rona ida-neʼe husi tenda laran. Nia hamnasa no hanoin: ‘Haʼu ferik ona, oinsá mak haʼu bele iha oan?’

Tinan tuirmai, Sara tuur-ahi oan-mane ida, hanesan buat neʼebé Jeová nia anju promete nanis. Abraão hanaran oan neʼe Isaac, neʼe katak “Hamnasa”.

 Bainhira Isaac maizumenus tinan lima, Sara haree Ismael sempre goza nia. Sara hakarak proteje ninia oan, tan neʼe nia husu ba Abraão atu haruka Agar no Ismael sai husi fatin neʼe. Foufoun Abraão lakohi. Maibé Jeová mós hakarak proteje Isaac, tan neʼe nia dehan ba Abraão: ‘Rona ba Sara, tanba haʼu sei kumpre haʼu-nia promesa liuhusi Isaac. Haʼu sei tau matan Ismael.’