Aberaham yange vôso Sara anyom kar kpishi. Ve undu ya ve u kundun iyol u ken Ur la, ve lu za tsan ken utenti (atumbe). Kpa vihi Sara ga, sha ci u yange na Yehova jighjigh.

Yange wan sar Sara tsung je a kaa a Aberaham ér: ‘Aluer u mar wan vea Hagar, kpankwase u a lu sha ikyev yam ne yô, me tôô mer ka wan wam.’ Shighe kar yô, Hagar mar wan u nomso. Iti i wan shon ér Ishemael.

Anyom nga kar imôngo yô, iorov utar mbagenev va Aberaham inya. Hen shighe ne, Aberaham lu anyom 99, Sara di lu anyom 89. Aberaham kaa a ve ér ve va mem hen itine kon hen ya na, ve ya iwer. U hen wer mbavannya mbara lu unô? Lu mbatyomov mba shaav! Ve kaa a Aberaham ér: ‘Ken inyom i ia kôr la, a va kuman hen shighe ne nahan vough yô, kwase wou una mar wan u nomso.’ Sara tema ken tenti lu ungwan. Maa a se shin ishima, a kaa ér: ‘Mimi je me mar wan er m bee iyol cii nee?’

Mba ker ken inyom igen yô, Sara mar wan u nomso, vough er yange mbatyomov mba Yehova tôndo zwa nahan. Aberaham ii wan shon iti ér Isaka, inja na yô ér ‘Ahan zwa.’

 Shighe u Isaka kuma anyom ataan la, Sara nenge Ishemael lu hiin un. Sara yange soo u kuran wan na. Nahan a za kaa a Aberaham ér a zenda Hagar vea Ishemael ve yem. Sha hiihii la, Aberaham soo u eren kwagh la ga. Kpa Yehova iyol na kpa soo u kuran Isaka. Nahan a kaa a Aberaham ér: ‘Ungwa kwagh u Sara a ôr la. Me nenge sha Ishemael doo doo. Kpa ka ken Isaka me er kwagh u m tende zwa la ye.’