Abrahamu aSara bakakwetene kwaminyaka miingi. Bakasiya muunzi wabo mubotu kuchisi chakuUri akuyookkala mumatente. Pesi Sara taakakaka pe nkaambo wakazi kuti zyoonse Jehova nzyakali kubabuzya zyakali kabotu.

Sara wakali kuyanda loko kuba amwana mpawo wakabuzya Abrahamu kuti: ‘Kuti muzike wangu Hagare waba amwana uzoobaanga nguwangu.’ Mukuya kwachiindi Hagare wakaba amwana mulombe. Zina lyamwanaakwe wakali Ismayeli.

Nikwakayinda minyaka, Abrahamu kali aminyaka iili 99, Sara kali aminyaka iili 89 bakaswayigwa abeenzu batatu. Abrahamu wakababuzya kuti bakkale muunsi amunsamu mpawo wakabapa chakulya. Ulizi na kuti beenzu aabo bakali bani? Bakali bangelo. Bakabuzya Abrahamu kuti: ‘Mumunyaka uuza muchiindi echino muzooba amwana mulombe.’ Sara wakali kuswiilizya kali mutente. Mpawo wakaseka kali kwaamba kuti: ‘Ndizoomuzyala biyeni mwana kandichembeede oobu?’

Mumunyaka wakatobela Sara wakatumbuka mwana mulombe mbuli mbaakasyomezya Jehova. Abrahamu wakamuuzika kuti nguIzaka, chaamba kuti “Kuseka.”

 Chiindi Izaka naakaba aminyaka iili musanu, Sara wakali kubona Ismayeli kaseka Izaka. Sara wakabuzya Abrahamu kuti atande Hagare aIsmayeli kuchitila kuti akwabilile mwanaakwe. Kumatalikilo Abrahamu taakali kuyanda pe. Pesi Jehova wakabuzya Abrahamu kuti: ‘Chita nzyaamba Sara. Ndiyoomulangania Ismayeli. Pesi zisyomezyo zyangu ziyoozuzikizigwa kwiinda muli Izaka.’