Abrahán chu Sara akglhuwata kata xtamakgaxtokgkgonit. Xlakan xmakgxtakgkgonit lu xastlan xchikkan anta kʼUr xlakata nalatamakgo klaktsu chiki. Pero Sara ni xtaʼakglhuwi xlakata xlipawan Jehová.

Sara lu xkgalhiputun chatum skgata, wa xlakata wanilh Abrahán: “Komo kiskujni Agar natakgalhiyan chatum skgata, la kila nawan”. Titaxtulh kilhtamaku, Agar kgalhilh chatum kgawasa, chu wanika Ismael.

Titaxtulh akglhuwa kata, akxni Abrahán xkgalhi 99 kata chu Sara 89, lakgapaxialhnankgolh kgalhtutu lakchixkuwin. Abrahán kawanilh pi xjaxkgolh kxtampin kgantum kiwi chu xwayankgolh. ¿Katsiya tiku umakgolh? ¡Xlakan ángeles xwankgonit! Wanikgolh Abrahán: “Kata nema mima, wix chu mimpuskat nakgalhiyatit chatum kgawasa”. Sara xkgaxmatma kxpulakni chiki, chu akxni kgaxmatli tuku wankgolh, litsilh chu lakpuwa: “¿Xlikana nakkgalhi chatum skgata maski klina kata?”.

Akxni titaxtulh akgtum kata, Sara kgalhilh chatum skgata, chuna la xwaninit xʼángel Jehová. Abrahán limapakuwilh Isaac, nema wamputun, “talitsi”.

 Akxni Isaac max akgkitsis kata xkgalhi, Sara akxilhli pi Ismael xlikgalhkgamanan. Xla xmakgtayaputun xkgawasa, wa xlakata alh tachuwinan Abrahán chu wanilh pi xtlakgalilh Agar chu Ismael. Xapulana, Abrahán ni xtlawaputun tuku wanilh. Pero Jehová na xkuentajtlawaputun Isaac, wa xlakata wanilh Abrahán: “Katlawa tuku waniman Sara. Akit nakkuentajtlawa Ismael. Pero tuku kmalaknuninitan nakgantaxtu kʼIsaac”.