Te Abraham sok te Sara bayalix jaʼbil nujpunemik. La yijkʼitayik jun lekil na te ay yuʼunik ta lum Ur swenta ya xnainik ta nailpakʼetik. Pero te Sara maʼyuk bin-ora och ta wulwulkʼop, melel ay smukʼul yoʼtan ta stojol te Jehová.

Te Sara la skʼan te ayuk jtul yal, jaʼ yuʼun la yalbey te Abraham: “Teme la ata jtul alal sok te kabat Agar, jaʼ kuʼun kʼoem te alale”. Ta patil, te Agar la sta jtul yal, Ismael sbiil la yakʼbeyik.

Bayal jaʼbil ta patil, kʼalal te Abraham ayix 99 yaʼbilal-a sok ayix 89 yaʼbilal-a te Sarae, kʼotik ta ulaʼtayel yuʼun oxtul winiketik. Te Abraham la yikʼtiklan jilel swenta ya skux yoʼtanik ta yanil teʼ sok la yikʼtiklan ta weʼel. ¿Yabal anaʼ machʼatik-a te winiketik-abi? Jaʼik chʼul-abatetik. Jich la yalbeyik te Abrahame: “Te jaʼbil ya xtale, te jaʼat sok te awinam yame ataik jtul alal”. Te Sara yak ta yaʼiyel stojol ta yutil nailpakʼ, te kʼalal la yaʼiy te bin yakik ta yalele, la smuken tseʼlay sok la yal ta yoʼtan: “¿Melelbal te ya jta jtul alal te bitʼil ayix kaʼbilale?”.

Kʼalal kʼax jun jaʼbil, te Sara la sta jtul alal, jich bitʼil jamal la yal te chʼul-abat yuʼun te Jehovae. Te Abraham la sbiilintes Isaac, te ya skʼan ya yal tseʼej.

 Kʼalal joʼeb yaʼbilal-a te Isaac, te Sara la yil te bitʼil te Ismael ya slaban te Isaac. Te Sara la skʼan te ya skanantay te yale, jich yuʼun la skʼopon te Abraham jich la yalbey: “Lokʼesa bael te Agar sok te Ismael”. Ta sjajchibal, te Abraham maba la skʼan la spas. Pero te Jehová jaʼnix jich la skʼan te ya skanantay te Isaac, jich yuʼun la yalbey te Abraham: “Chʼuunbeya skʼop te Sara. Joʼon ya jkanantay te Ismael. Pero te bintik jamal kaloj yame xkʼot ta pasel ta swenta te Isaac”.