Li Abraan xchiʼuk Sarae jal xa ox yikʼoj sbaik. Laj yiktaik komel li snaik ti toj kʼupil sba ta Ure, sventa xbat nakiikuk ta karpanaetik. Li Sarae muʼyuk chopol laj yaʼi sba yuʼun spatoj yoʼonton ta stojolal Jeova.

Ta skoj ti tskʼan tajek yol li Sarae xi laj yalbe li Abraane: «Avokoluk chiʼino li jkiaratik Agare. Yikʼaluk van jaʼ snaʼ x-alaj, jech jaʼ kol chkʼot li yole». Vokʼ jun yol ta tsʼakal li Agare, Ismael laj yakʼbeik sbi.

Jun velta kʼotik ta vulaʼal oxvoʼ viniketik ta sna Abraan kʼalal 99 xa ox sjabilale, li Sarae 89 xa ox sjabilal ek. Li Abraane laj yalanbe ti akʼo xkux yoʼontonik ta yolon teʼe xchiʼuk ti akʼo komikuk ta veʼele. ¿Mi xanaʼ buchʼutik jaʼ li viniketik taje? Jaʼik anjeletik. Xi laj yalbeik komel li Abraane: «Ta yan jabile oy xa ox jun akeremik xchiʼuk li Sarae». Li Sarae te yakal chchikinta ta yut skarpanaik, vaʼun tey lik tseʼinuk stuk xchiʼuk xi la snope: «¿Mi ta melel xuʼ to xkil junuk kol ti meʼelun xae?».

Kʼalal echʼ xa ox jun jabile, li Sarae vokʼ jun yol jech kʼuchaʼal laj yal komel li yaj-anjel Jeovae. Isaak laj yakʼbe sbi skerem li Abraane, ti jaʼ skʼan xal «tseʼimol».

 Kʼalal voʼob toʼox sjabilal li Isaake laj yichʼ labanel yuʼun li Ismaele, kʼalal laj yakʼ venta li Sarae chopol laj yil, jaʼ yuʼun xi laj yalbe li Abraane: «Tako lokʼel li Agar xchiʼuk Ismaele». Mu ox skʼan jech spas li Abraane. Pe li Jeovae tskʼan ti lekuk xchʼi tal li Isaake, jech oxal xi laj yalbe li Abraane: «Paso li kʼusi chal avajnil Sarae, yuʼun voʼon ta jchabi li Ismaele. Yuʼun li kʼusi kaloje jaʼ chkʼot ta pasel ta stojolal li Isaake».