Ebraham vẹ Sera rọvwọn krire. Ayen yanjẹ omamọ uwevwin rayen vwo vwẹ Ur, utughẹ kọyen ayen dia. Ẹkẹvuọvo, Sera brenu-u kidie ọ vwẹroso Jihova.

Sera guọnọ ọmọ mamọ kọyensorọ ọ vwọ vuẹ Ebraham nẹ, ‘Odibo mẹ Hagar de vwiẹ ọmọ kẹ wẹ, me sa reyọ kerẹ ọmọ mẹ.’ Ọke vwọ yanran na, Hagar de rhi vwiẹ ọmọshare. Odẹ rọyen Ishmael.

Ikpe buebun vwọ wan nu, Ebraham vwọ hẹ ẹgbukpe 99, Sera ke rha hẹ ẹgbukpe 89, erhorha erha da kọn bru ayen rhe. Ebraham de se ayen nẹ ayen rhi rovwonma vwẹ otọ rẹ urhe, ọ da je kẹ ayen emu. Wọ vughe erhorha nana? Ayen emekashe! Ayen da vuẹ Ebraham: ‘Ọke tiọna vwẹ ukpe rọ cha na, ovwan che vwiẹ ọmọshare.’ Jẹ, Sera kerhọ vwẹ utughẹ na. Ọ da hwẹ phiyọ evun, jẹ o roro: ‘Mi se ghini vwiẹ ọmọ vwẹ ọke ọghwo mẹ na?’

Ukpe rọ vwọ kpahọn, Sera de vwiẹ ọmọshare kirobo rẹ amakashe rẹ Jihova tare. Ebraham de se ọmọ na Aizik, ro mudiaphiyọ “Ehwẹ.”

 Aizik vwo te ẹgbukpe iyorin, Sera da mrẹ nẹ Ishmael reyọ Aizik vwọ jehwẹ. Ọ guọnọ chochọ rẹ ọmọ rọyen, ọtiọyena ọ da vuẹ Ebraham nẹ ọ djẹ Hagar vẹ Ishmael nẹ uwevwin na. Ẹsosuọ, Ebraham guọnọ ruo-o. Jihova da vuẹ Ebraham: ‘Kerhọ rẹ Sera. Me cha vwẹrote Ishmael. Ẹkẹvuọvo, ive mẹ che rugba womarẹ Aizik.’