Abrahamu na Sara vho vha vho no fhedza miṅwaha minzhi vho vhingana. Vho vha vho sia muḓi wavho wavhuḓi ngei Uri nahone zwino vha tshi khou dzula denndeni. Fhedzi Sara ho ngo gungula ngauri o vha a tshi fulufhela Yehova.

Sara o vha tshi khou ṱoḓa ṅwana nga mbilu yawe yoṱhe lwe a ri kha Abrahamu: ‘Arali mushumeli wanga Hagara a vha na ṅwana, ndi ḓo mu dzhia a vha wanga.’ Nga u ya ha tshifhinga, Hagara a vha na ṅwana wa mutukana. O vha a tshi pfi Isimaele.

Ho no fhela miṅwaha minzhi, musi Abrahamu e na miṅwaha ya 99 nahone Sara e na ya 89 vho mbo ḓi dalelwa nga vhaeni vhararu. Abrahamu o vha ramba uri vha ḓe vha awele fhasi ha muri nahone vha ḽe zwiḽiwa. Naa ni a ḓivha uri vhenevho vhaeni vho vha vhe vhonnyi? Vho vha vhe vharuṅwa. Vho vhudza Abrahamu uri: ‘Ṅwaha u ḓaho nga tshenetshi tshifhinga, inwi na mufumakadzi waṋu ni ḓo wana ṅwana wa mutukana.’ Sara o vha o thetshelesa e ngomu denndeni. A sea nahone a ri: ‘Naa ndi nga kha ḓi vha na ṅwana ndo no aluwa nga u rali?’

Ṅwaha u tevhelaho, Sara a beba ṅwana wa mutukana, samusi muruṅwa wa Yehova o fulufhedzisa. Abrahamu a mu ira dzina ḽa Isaka, zwine zwa amba “Tshiseo.”

 Musi Isaka e na miṅwaha miṱanu, Sara a vhona Isimaele a tshi khou mu kolela. Ngauri o vha a tshi ṱoḓa u tsireledza ṅwana wawe, o ya kha Abrahamu nahone a mu humbela uri a pandele Hagara na Isimaele. Mathomoni, Abrahamu o hana u ita ngauralo. Fhedzi Yehova a ri kha Abrahamu: ‘Thetshelesa Sara. Nṋe ndi ḓo ṱhogomela Isimaele. Fhedzi mafulufhedziso anga a ḓo ḓadzea nga Isaka.’