Abrahán yéetel Saraeʼ tsʼoʼok kaʼach u máan yaʼab años tsʼoʼokok u beeloʼob. Tu pʼatoʼob le jatsʼuts naj yaantiʼob tu kaajil Uroʼ utiaʼal ka kajlakoʼob tiʼ najoʼob beetaʼanoʼob de nookʼ. Kex beyoʼ Saraeʼ kiʼimak u yóol tumen ku confiar tiʼ Jéeoba.

Tumen Sara taak u yantal juntúul u hijoeʼ, tu yaʼalaj tiʼ Abrahán: ‹Wa in sirvienta Agar ku yantal juntúul u hijo ta wéeteleʼ, yaan in wilik bey in tiaʼaleʼ›. Ka máan kʼiineʼ Agareʼ yanchaj juntúul u hijo, Ismael tu tsʼáaj u kʼaabaʼ.

Ka máan kʼiineʼ, le yaan 99 años tiʼ Abrahán yéetel 89 tiʼ Saraeʼ, xíimbaltaʼaboʼob tumen óoxtúul máakoʼob. Abrahaneʼ tu yaʼalajtiʼob ka jeʼelkoʼob yáanal junkúul cheʼ yéetel ka pʼáatkoʼob janal. ¿A wojel wa máax le máakoʼobaʼ? ¡Angeloʼob! Letiʼobeʼ tu yaʼaloʼob tiʼ Abrahán: ‹Teʼ tuláakʼ año bey jeʼex teʼ kʼiinoʼobaʼ, teech yéetel a wataneʼ yaan u yantal juntúul a chan hijoʼex›. Saraeʼ tiaʼan kaʼach ichil le najoʼ táan u yuʼubik u tsikbaloʼob. Letiʼ túuneʼ mukul cheʼejnajeʼ ka tu yaʼalaj: ‹¿Tu jaajil wa jeʼel u yantal juntúul in chaambal kex tsʼoʼok in chʼíijleʼ?›.

Ka máan junpʼéel añoeʼ, Saraeʼ anchaj juntúul u chaambal jeʼex tu yaʼalaj u ángel Jéeobaoʼ. Abrahaneʼ tu tsʼáaj u kʼaabaʼt Isaak, lelaʼ u kʼáat u yaʼal «cheʼej».

 Le yaan kex cinco años tiʼ Isaakoʼ, Saraeʼ tu yilaj jach ku burlartaʼal Isaak tumen Ismael. Letiʼeʼ taak u kanáantik u hijo le oʼolal bin yiknal Abrahaneʼ, ka tu yaʼalajtiʼ ka u tojolchʼint Agar yéetel Ismael. Tu káajbaleʼ Abrahaneʼ maʼ taak u beetik kaʼachiʼ. Chéen baʼaleʼ Jéeobaeʼ u kʼáat u kanáant xan Isaak, le oʼolal tu yaʼalaj tiʼ Abrahán: ‹Uʼuy baʼax ku yaʼaliktech Sara. Teen kin kanáantik Ismael. Chéen baʼaleʼ le baʼaxoʼob in waʼalmoʼ yaan u béeytal tu yoʼolal Isaak›.