Maʼ raca stale iza de bichaganáʼ Abrahán ne Sara. Bisaanacabe yoo galán ni gúpacabe Ur para chindézacabe ndaaniʼ yoo de lari. Peru qué ñuu dxi ñaca quejar Sara purtiʼ gupa confianza Jiobá.

Cumu guizáʼ racalaʼdxiʼ Sara gapa ti baʼduhuiiniʼ la? gúdxibe Abrahán: «Pa gapa Agar gunaa ni racané naa ti xiiñiluʼ, zeeda gaca baʼduhuiiniʼ ca casi xiiñeʼ». Despué gupa Agar ti xiiñiʼ ne gulee lácabe laa Ismael.

Gudiʼdiʼ si tiempu, dxi napa Abrahán 99 iza ne Sara 89 yeganna chonna binni laacabe. Biʼniʼ invitar Abrahán laacabe guiziiláʼdxicabe xaʼnaʼ ti yaga ne guiaanacabe para gócabe. ¿Nannuʼ tu laacabe la? Ángel laacabe. Gúdxicabe Abrahán: «Sti iza ca, lii ne xheelaluʼ zápatu ti xiiñitu». Nuu Sara ndaaniʼ yoo de lari que cayunadiaga, ne ora binadiágabe ni guníʼ ca hombre que bixídxibe ndaaniʼ ladxidoʼbe ne guníʼ íquebe: «¿Dxandíʼ nga zapaʼ ti xiiñeʼ biaʼ iza napaʼ riʼ la?».

Sti iza que, gupa Sara ti baʼduhuiiniʼ cásipeʼ modo gudxi ángel stiʼ Jiobá laa. Gulee lá Abrahán laabe Isaac, ni raca significar «risa».

 Dxi napa Isaac biaʼ gaayuʼ iza, biiyaʼ Sara cayuni burla Ismael laabe. Cadi nuube guizaaca xiiñibe gastiʼ, ngue runi guyebe ra nuu Abrahán ne gúdxibe laa: «Guladxi Agar ne Ismael de raríʼ». Qué ninagá Abrahán ñuni ni. Peru qué racalaʼdxiʼ Jiobá gaca Isaac gastiʼ, ngue runi gúdxibe Abrahán: «Biʼniʼ ni cayabi Sara lii. Naa zapaʼ Ismael. Peru Isaac nga chiguiquiiñeʼ para gaca cumplir ca promesa stinneʼ».