Abrahán né Sara ma xidzú de goló cuaʼyibu saʼyibu. Bisianyibu lidx mózyibu Ur né goylésyibu lainy yoʼ lairy. Per Sara goyoʼbu goxt ná bibanybu scú portín gopbu confianz lóo Dios.

Sara nigolú goniiny ñap toib badaʼ, por ngú gochbu Abrahán: «Pal xcriada Agar ñap toib xiinlo, naʼ nagobioya láabu xomod xiinna». Después, goyoʼ toib xiin Agar né goleʼyibu laa nidxiyencu Ismael.

Godudy xidal íz, órni Abrahán gop 99 íz né Sara 89 íz, tzón buñ goyguen layibu. Abrahán biruʼ layibu tzachéyibu xpalaa toib yac né nabésyibu ñactzay ni ñooyibu. ¿Nanlo chú buñ goyguen layibu la? Gocyibu ángeles. Layibu gochyibu Abrahán: «Ló dzureʼ stoib íz, looy né tzeʼel lo sioʼ toib xiinto». Sara bicadiag ni goniʼ chop ángelescu, ór cú bixiichbu né goniʼbu ló xpensarybu: «¿Labúu sioʼ xiinna ná ma buñgol naʼ la?».

Ló stoib ízcu, goyoʼ toib xiin Sara, xomod goniʼ ángel xtuny Jehová. Abrahán goleʼ laa badaʼcu Isaac, ni rarexa «galrraxiich».

 Órni Isaac gop midid gáay íz, Sara bibiʼbu que Ismael gosaló bixiichbu Isaac. Sara goniiny ñan xiinien, por ngú goninébu Abrahán né goniʼbu: «Bilaʼk Agar né Ismael». Primer Abrahán diti gosaguel ñony láani. Per Jehová gochbu Abrahán: «Bisob ni ná Sara. Naʼ gaana Ismael. Per guirá galnasác ni goodxi looy guicaʼlo, sacaʼlo láani por Isaac».