Lot chachajj Abrahán tiopampiw Canaán oraqen jakasipjjäna. Walja uywanakanïpjjänwa, janiw espaciojj utj-jjänti. Ukatwa Abrahanajj Lot sobrinopar akham säna: ‘Janiw mä pachpa lugaranak jakjjsnati. Mirä amp suma, jaljtañäni. Kawksarus sarañ munta uk ajllisim, nayajj maysa toqeruw saräjja’ sasa. Abrahanajj suma jaqënwa, ¿uk amuytati?

Lot chachajj mä suma oraq uñjäna, ukajj suma chʼojjña pastonïnwa, umas walirakïnwa. Ukatwa uksar sarañ amtäna. Sodoma marka jakʼaruw familiapampejj jakasir sarapjjäna.

Sodoma markansa, uka jakʼankir Gomorra markansa sinti jan wali jaqenakaw jakapjjäna. Ukatwa Jehová Diosajj uka pä markar chhaqtayañ amtäna. Lot chachampi familiapampir salvañ munasajja, Diosajj pä angelaruw khitäna, akham sanipjjañapataki: ‘¡Ratuk akat mistjjapjjam! ¡Jehová Diosajj aka markar tʼunjaniwa!’ sasa.

Lot chachajj janiw ratuk mistkänti. Ukatwa angelanakajj juparusa, esposaparusa, pä phuchaparusa amparat katusin ratuk irpsupjjäna. Akham sapjjarakïnwa: ‘¡Tʼijtapjjam! Jan jiwañatakejj ¡escapapjjam! ¡Janirak qhepar uñtapjjamti! Qhepar uñtapjjätajj jiwapjjätawa’ sasa.

Zoar sat markar puripjjäna ukhajja, Jehová Diosajj Sodoma markarusa Gomorra markarusa ninampi azufrempwa jalljam purintayäna. Uka pä markajj qʼala phichantataw uñjasïna. Lot chachan esposapasti Diosar jan istʼasaw qhep uñtäna, ukatwa jayu qalar  tuküna. Lot chachampi phuchanakapampikiw Diosar istʼapjjatap laykojj salvasipjjäna. Lot chachan warmipajj janiw Diosar istʼkänti, ukajj familiapatakejj wali llakkañäpachänwa. Ukampis jupanakajj Jehová Diosaruw istʼapjjäna, ukaw jan sinti llakisipjjañapatakejj yanaptʼäna.