Abraamun nin Lɔtu m’ɔ ti i niaan wa’n be tran Kanaan. Be sa nun nnɛn mun be wa sɔnnin kpa. I sɔ’n ti’n, lika’n w’a juman be kun. Yɛ Abraamun seli Lɔtu kɛ: ‘E nɲɔn’n e kwlá tranman likawlɛ kun. Nian, lika’n yɛ ɔ o lɛ-ɔ. Yaci, kle lika nga a klo kɛ á kɔ́’n naan n kusu n wɔ bue uflɛ su.’ I sɔ’n kle kɛ Abraamun bumɛn i ngunmin i wun akunndan. ?Nɛ́n i-ɔ?

Lɔtu wunnin lika klanman kpa kun. Ɔ o klɔ nga be flɛ i kɛ Sodɔmun’n i wun koko lɛ. Nzue o lɔ kpa, yɛ lɔ ijre’n ti klanman. I sɔ’n ti’n, Lɔtu fali lɔ lika’n, kpɛkun ɔ nin i awlofuɛ mun be ko trannin lɔ.

Sodɔmun nin Gomɔru klɔ m’ɔ mɛntɛn i’n be sufuɛ mun be yo sa tɛ dan. Ɔ maan Zoova fali ajalɛ kɛ ɔ́ núnnún klɔ sɔ mun. Sanngɛ Zoova kunndɛ kɛ Lɔtu nin i awlofuɛ mun be fite nun. I sɔ’n ti’n, ɔ sunmannin anzi nɲɔn be wun lɔ. Anzi mun be seli be kɛ: ‘An jaso klɔ’n su ndɛndɛ! Zoova su wa nunnun i.’

Lɔtu w’a kaman lɛ w’a fiteman. Ɔ sisili i bo. I sɔ’n ti’n, anzi mun be trali Lɔtu nin i yi ɔ nin i wa bla nɲɔn mun be sa, be fali be klɔ’n nun fiteli. Be seli be kɛ: ‘An wanndi wɔ! I liɛ’n, amún ɲán amun ti. Nán amun nian amun sin. Sɛ amun nian amun sin’n, amún wú!’

Kɛ be juli klɔ nga be flɛ i kɛ Zɔar’n su’n, Zoova yoli maan sin nin sufru be fin ɲanmiɛn su lɔ guali Sodɔmun nin Gomɔru klɔ’n su.  Klɔ nɲɔn sɔ mun be nunnunnin mlɔnmlɔn. Lɔtu i yi’n i ɲin w’a yiman Zoova, ɔ niɛnnin i sin. I sɔ’n ti’n, ɔ kacili njin yɔbuɛ. Sanngɛ Lɔtu nin i wa bla nɲɔn mun b’a wuman, afin be ɲin yili Zoova. Nanwlɛ, kɛ Lɔtu i yi’n i ɲin w’a yiman Zoova’n, i sɔ’n yoli Lɔtu nin i mma mun be ya kpa. Sanngɛ kɛ mɔ be liɛ’n be ɲin yili Zoova’n ti’n, be liɛ yoli ye.