ÑYE’ELAN 10
Simesa’ane jam é nga kui minga Lot
Lot a mbe a nyiñik e Canaan a Abraham; Abraham a mbe monyañ ésa. Nde biyem bi Abraham a bi bi Lot bi nga taté na bia bo abui, si ke tyôtyoé, teke fe avale be mbe ve ke ôsu a tabe vôme wua. Ane Abraham a nga jô Lot na: ‘Bi vo’o beta tabe vôme wua, ma ye’elane wo na, ô tobe vôme wo kômbô ke tabe, me’e ke mé ke tabe vôme mbok.’ Nga ô lôô na Abraham a nga telé miñyiane mi Lot ôsu?
Ane Lot a nga fombô, a yene mbamba vôm fefele tison be mbe be loone na Sodome. Tison éte é mbe é bili abui mendim a mbamba bilok. Ane Lot a nga tobe na a ke tabe wôé a nda bôte jé.
Tison éziñ é mbe fefel Sodome, be loone je na Gomorrhe. Bôte ya betisone bete be mbe mbia be bôt. Be mbe be bo’o angôndô ya mbia be mam, nde Yéhôva a nga tyi’i na a zu mane tyam betisone bete. Ve Zambe a nga kômbô kamane Lot a nda bôte jé. Ane a nga lôme beéngele na be ke bemene Lot na: ‘Bo’ané avôl! Mi ji’a kôlô tisone nyi! Amu Yéhôva a zu tyame je!’
Lot a nga bo njem. A nji ji’a kôlô. Ane beéngele be nga bi Lot wo, a minga wé, a bengo bap, a kuli be nseñ avôl avôl, be jô’ô be na: ‘Mata’ané mimbil! Tubané asu na mi bo te wu, te mia fombô mvus. Nge mi fombô mvus, mii wu.’
Éyoñ be nga kui tisone ba loone na Tsoar, Yéhôva a nga bo na nduan a soufre bi noñ e Sodome a Gomorrhe. Yéhôva a nga tyam
betison bete bebaé. Nté be mbe be tubu’u, minga Lot a nga bo Yéhôva melo, a nga fombô mvus, ane Yéhôva a nga bo na a veñesan ako’o nku. Ve Lot a bone bé be nji wu amu be nga bo Yéhôva mewôk. Be nga yiane wô’ô mintaé nlem amu môte wop a nga bo melo. Ve be mbe njalan a mevak amu be nga vô’ôlô Yéhôva.“Simesa’an nga Lot.”—Luc 17:32