Lumúanrugu meha Kanán lawinwanda Lotu luma Abüraámü le liyaurite. Aba meha hagibedagun habiñanigu darí lun lalouguadun fulasu houn súngubei. Ligía lariñagunbei Abüraámü lun Lotu: “Siñaali wawinwandun lidan ligiaméme fulasu. Anuadirabéi haliñounba lan bidin, ábameti nidin lidoun le aban oubaü”. Ma meha lubuidun ligaburi Abüraámü, adián?

Aba larihini Lotu oubaü le buídutimabei lídangiñe sun fulasu ligía ani gibe lan duna luma sagadi ñein. Ligía láguyunbei hau liduheñu lidoun fulasu le yarafabei lun aban uburugu gíriti Sodoma. Lárigiñe, aba houdin awinwanda Sodoma.

Wéiriti meha hariban gürigia ha Sodomabaña hama ha lídanbaña uburugu Gomora le yarafabei lun. Ma meha lanarime hariban darí lun desidírü lan Heowá lagünrinchaguni uburugu burí ligía. Kei busén lubéi Bungiu lesefuruni Lotu hama liduheñu, óunahati bián ánheligu ariñaga houn: “Furese humá! Furí humá lídangiñe fulasu le! Lagünrinchaguaali Heowá!”.

Kei adarasaha lan Lotu lun láfuridun uburugugiñe, aba hárügüdüni ánheligu lúhabu, túhabu lani weiriou luma háhabu lisaanigu würiña, aba hasagaruniña ñéingiñe. Ariñagatiña houn: “Éibaagua humá! Anuraha humá lau hibagari ani madigiragua humá hárigoun, anhein hadüga, hóunweguba”.

 Dan le hachülürünbei lidoun uburugu le gíribei Sóarü, aba ladügün Heowá lun láhuyun watu gemeti luma súfuru luagun Sodoma luma Gomora. Günringuawati biángubei uburugu ligía. Aba maganbadi tan lani Lotu weiriou lun Heowá, digiguatu tárigoun, ábati tasaliragun ábanme guáriua lautu salu. Ánheinti Lotu hama lisaanigu séfutiña ladüga gaganbadi hamá. Chóuruti hiru hamá ladüga maganbadi tan lani Lotu weiriou, íbini ítara, darangiluti hasandiragun houngua ladüga gaganbadi hamá lun Heowá.