Lote te katwama hamwe ni natu Apalahama mu chifuchi cha Kanana. Hakupalika cha mashimbu Apalahama ni Lote yapwa ni yimuna yinji. Kwakapwile nawa chihela chakumbana chakupichilamo yimuna yeswe. Apalahama yalweza Lote ngwenyi: ‘Kutuchi kuhasa nawa kutwama mu chihela chimuwika. Ngunaliumbu, sakula sali lize muoya, ami munguya sali likwo.’ Apalahama kasolwele zango linji, nyi ngwami?

Lote yamona chihela chipema mu chifuchi hakamwihi ni mbonge yize te avuluka ngwo Sondome. Ku chihela chacho kwapwile meya ni yambu yinji. Chocho yaya ni kutwamako ni asoko jenyi.

Atu amu mbonge ya Sondome ni Ngomora te kakulinga upi unji. Kwamba umwenemwene, te atu api chinji, kashika Yehova akwachile chiyulo cha kwonona mbonge jacho. Alioze kazangile kulamwina Lote ni usoko wenyi, kashika atumine angelo aali hanga aatoweze ngwo: ‘Tambwisenu! Hanga nutuhuke muno, mumu Yehova mwonona mbonge jino.’

Alioze Lote kakatuhukile kawashi-washi. Aye yashimbwila chinji. Hachino, angelo yakwata ku moko ja Lote, mukwo-pwo, ni ana jenyi aali a mapwo yaatuhwisa haze lia mbonge kawashi-washi, ni kwaamba ngwo: ‘Chinenu! Nulamwine mwono wenu, nawa kanda nutala kunyima. Nyi munutala kunyima, kumunufwa!’

 Muze ahetele mu mbonge ya Zoare, mba Yehova yanokesa fundanga ni kahia mu Sondome ni Ngomora. Mbonge jino jiali yajinongesa. Muze pwo lia Lote ehukile shimbi ya Yehova ni kutala kunyima, iye yalumuka chingungu cha mungwa! Alioze Lote ni ana jenyi a mapwo yaalamwina mumu kwononokene Yehova. Ayo kevwile yinyengo yinji mumu iye kehukile shimbi ya Yehova. Chipwe chocho, Lote ni ana jenyi kanakawahilila chinji, mumu kakawile usongwelo wa Yehova.